• O encontro celebrarase os días 25 e 26 de novembro de 2025, en modalidade híbrida, e reunirá a especialistas internacionais para debater sobre os retos e oportunidades dunha IA sostible

A Coruña, 12 de novembro de 2025.- Os vindeiros días 25 e 26 de novembro celebrarase no Centro de Investigación en Tecnoloxías da Información e as Comunicacións (CITIC) da Universidade da Coruña o I Simposio en Intelixencia Artificial Verde, unha iniciativa promovida pola Cátedra Inditex-UDC en Algoritmos Verdes. O evento desenvolverase en modalidade híbrida, con sesións presenciais na Coruña e acceso virtual para participantes remotos.

O simposio nace co obxectivo de crear un espazo de encontro entre a comunidade investigadora, o sector empresarial e as institucións, para abordar os desafíos actuais da Intelixencia Artificial desde unha perspectiva de sustentabilidade e compromiso medioambiental.

O cambio climático afecta de xeito transversal ás nosas sociedades e a actividade computacional —incluíndo os modelos de IA e os centros de datos— é xa unha fonte significativa de emisións de gases de efecto invernadoiro. Fronte a este reto, a Cátedra aposta por un enfoque multidisciplinar e cooperativo que permita avanzar cara a algoritmos máis sostibles, modelos máis eficientes en canto ao consumo enerxético e aplicacións que contribúan activamente á loita contra a crise climática.

O programa do simposio incluirá conferencias, mesas redondas e presentacións de proxectos de investigación e ciencia cidadá, desenvolvidos desde a Cátedra, así como iniciativas no ámbito da chamada IA Verde, cunha ampla representación de especialistas de referencia nesta temática.

Conferencias convidadas

O encontro contará coa participación de expertas e expertos internacionais que achegarán unha visión crítica e multidisciplinar sobre os retos e oportunidades da Intelixencia Artificial no desenvolvemento sostible:

• Amparo Alonso Betanzos, catedrática de Ciencias da Computación e IA da Universidade da Coruña e coordinadora do Laboratorio de I+D en Intelixencia Artificial (LIDIA). Membro do Consello Asesor de Intelixencia Artificial do Ministerio para aTransformación Dixital e da Función Pública.
• Ricardo Vinuesa Motilva, associate professor do Departamento de Enxeñaría Espacial na Universidade de Michigan. ERC Consolidator Grant.
• Mar Santamaria-Varas, arquitecta e cofundadora de 300.000 Km/s, especializada en planificación urbana, políticas públicas e sustentabilidade.
• Jorge Castellanos Claramunt, profesor titular de Dereito Constitucional na Universitat de València, e actualmente Vogal Coordinador da Unidade de Apoio e Relacións Institucionais da Axencia Española de Protección de Datos.

A inscrición é gratuíta, mais require rexistro previo a través da seguinte ligazón.

Máis información na páxina web da Cátedra.