A Coruña, 3 de marzo de 2025.- No marco da Cátedra INDITEX-UDC de Intelixencia Artificial en Algoritmos Verdes, o vindeiro venres 7 de marzo ás 12:00 h celebrarase na Sala Cloud do CITIC da Universidade da Coruña (UDC) a terceira cita do ciclo “Converxencia verde: IA para un futuro sostible”.

Coral Calero Muñoz impartirá a ponencia titulada “Green is the new black. Retos no desenvolvemento do software e a IA”, na que abordará os desafíos que supón o consumo enerxético asociado ao software e á intelixencia artificial.

A crecente relevancia do software na sociedade é innegable, e a súa evolución estivo marcada polo impacto dos datos, internet e a intelixencia artificial. Porén, este avance tamén implica un aumento do consumo enerxético, con estimacións que indican que as tecnoloxías da información e as comunicacións (TIC) poderían representar ata o 20 % do consumo global de enerxía no ano 2030. A charla analizará os factores que impulsan este incremento e proporcionará exemplos reais sobre consumo enerxético, así como ferramentas e metodoloxías para a súa medición.

Calero Muñoz é doutora en Enxeñaría Informática e Catedrática da Universidade de Castela-A Mancha (UCLM). É directora do grupo de investigación GreenTeam Alarcos e membro do Comité Español de Ética da Investigación.

Esta actividade é gratuita e para asistir é necesario rexistrarse a través desta ligazón. Esta charla forma parte das actividades de Marzo Ambiental 2025 da UDC, un ciclo organizado pola Oficina de Sustentabilidade e os Comités Green Campus da universidade co obxectivo de ofrecer unha visión global sobre a realidade climática e a sustentabilidade. O programa desta iniciativa, que se desenvolverá entre o 6 e o 31 de marzo, inclúe actividades teóricas (palestras, mesas redondas) e prácticas (obradoiros, visitas técnicas, voluntariado ambiental).

Investigación para reducir o impacto ambiental das TIC

A Cátedra INDITEX-UDC de IA en Algoritmos Verdes forma parte das 21 cátedras ENIA (Estratexia Nacional en Intelixencia Artificial) promovidas polo Ministerio para a Transformación Dixital e da Función Pública.

Dirixida pola investigadora do CITIC Verónica Bolón, esta iniciativa ten como obxectivo minimizar o impacto ambiental das aplicacións informáticas e fomentar o desenvolvemento de solucións sostibles a través dos denominados “algoritmos verdes”.

Segundo Bolón, “a colaboración con Inditex dentro do marco desta cátedra permítenos afrontar novos desafíos na industria e, ao mesmo tempo, servir como plataforma para a validación e escalabilidade dos resultados obtidos”.

A cátedra está composta por un equipo de investigación de 20 persoas, 16 das cales están adscritas ao Centro de Investigación en Tecnoloxías da Información e as Comunicacións da UDC (CITIC).