• A charla terá lugar o vindeiro 14 de novembro e forma parte do ciclo de conferencias “Converxencia verde: IA para un futuro sustentable” da Cátedra Inditex-UDC en Algoritmos Verdes.

O vindeiro venres, 14 de novembro, ás 12:00 horas, celebrarase na sala Cloud do CITIC da UDC unha nova conferencia do ciclo “Converxencia Verde: IA para un futuro sustentable”, organizado pola Cátedra Inditex-UDC de Intelixencia Artificial en Algoritmos Verdes.

Nesta ocasión, contarase coa participación de Concha Monje, catedrática da Universidade Carlos III de Madrid (UC3M) e directora do Laboratorio de Robótica Branda do grupo RoboticsLab, pioneiro no desenvolvemento e control de articulacións robóticas brandas. A súa traxectoria investigadora, recoñecida con numerosos premios, combina o rigor científico coa aplicación práctica en colaboración con empresas do sector tecnolóxico.

A conferencia, titulada “Cara á simplicidade no deseño e control de robots brandos”, introducirá o concepto de robótica branda, unha área emerxente que se inspira na natureza para crear robots máis flexibles, seguros e adaptables. A diferenza dos robots tradicionais, feitos con materiais ríxidos, os robots brandos están construídos con materiais elásticos e deformables —semellantes aos tecidos biolóxicos— que lles permiten moverse e interactuar co seu contorno dun modo máis natural. Isto abre posibilidades en ámbitos como a medicina, a rehabilitación ou a exploración en contornas delicadas.

Durante o relatorio, Monje explicará como a busca da simplicidade no deseño e control destes robots pode evitar o uso de modelos excesivamente complexos baseados en intelixencia artificial, optando por enfoques analíticos máis eficientes. Ademais, presentará o concepto de controlador PID fraccionario, unha versión xeneralizada do coñecido controlador PID, que permite dotar os robots brandos da robustez necesaria sen depender de técnicas baseadas en datos.

A sesión é de entrada libre, pero cómpre inscribirse previamente a través deste formulario de rexistro.