A Comisión Europea lanzou a convocatoria do European Green Deal – Pacto Verde Europeo, financiada no marco do Horizonte 2020, que busca fomentar o desenvolvemento de proxectos de investigación e innovación que poñan freo á crise climática e axuden a protexer a biodiversidade e os ecosistemas europeos. Cun orzamento de 1.000 millóns de euros, trátase da última e maior convocatoria no marco de Horizonte 2020.

Esta convocatoria pretende xerar oportunidades de innovación, acelerando a transición cara á sustentabilidade e unha Europa climaticamente neutra para 2050, buscando, ademais, estimular a recuperación trala crise do coronavirus.

Os proxectos financiados deberán producir resultados beneficiosos en dez áreas, oito das cales reflicten as liñas principais do Pacto Verde Europeo, como son:

1. Aumento da ambición climática
2. Enerxía limpa, asequible e segura
3. Industria para unha economía limpa e circular
4. Edificios eficientes en enerxía e recursos
5. Mobilidade sustentable e intelixente
6. Da granxa á mesa
7. Biodiversidade e ecosistemas
8. Ambientes libres de tóxicos e sen contaminación

Mentres que dúas das áreas son horizontais: fortalecer o coñecemento e empoderar aos cidadáns, que ofrecen unha perspectiva a máis longo prazo para lograr as transformacións establecidas no Pacto Verde Europeo.

A convocatoria estará aberta ata o 26 de xaneiro de 2021.

Máis información