A investigadora do CITIC Amparo Alonso foi designada membro do Consello Asesor de Intelixencia Artificial, un órgano consultivo que proporcionará asesoramento e recomendacións independentes ao Goberno de España sobre as medidas a adoptar para garantir un uso seguro e ético da IA.

O órgano está composto por 18 expertos españois de máximo prestixio a nivel internacional na materia, que contribuirán á finalización e posta en marcha da Estratexia Nacional de Intelixencia Artificial. Entre eles, atópase Amparo Alonso, que ademais de investigadora do CITIC é catedrática de Ciencia da Computación e Intelixencia Artificial da UDC e presidenta da Asociación Española para a Intelixencia Artificial.

A vicepresidenta e ministra de Asuntos Económicos e Transformación Dixital, Nadia Calviño, preside o Consello Asesor, e a secretaria de Estado de Dixitalización e Intelixencia Artificial, Carme Artigas, ocupa a Vicepresidencia.

A primeira reunión do Consello Asesor desenvolveuse o pasado luns 20 de xullo de forma semipresencial no Ministerio de Asuntos Económicos e Transformación Dixital.