A investigadora e catedrática Amparo Alonso Betanzos, do CITIC da Universidade da Coruña, participou no congreso internacional GECCO 2025 (Genetic and Evolutionary Computation Conference), un dos principais foros mundiais en computación evolutiva e intelixencia artificial, organizado pola ACM SIGEVO en Málaga.

Nesta edición, celebrada en formato presencial e virtual, Amparo Alonso presentou o relatorio “Rethinking Efficiency in Machine Learning”, na que reflexionou sobre os desafíos actuais da intelixencia artificial en termos de eficiencia, transparencia e sustentabilidade. Durante a súa intervención, destacou que o éxito dos modelos actuais de IA baseouse en aumentar a súa precisión á conta dunha maior complexidade e consumo enerxético. Estímase que, de non reverterse esta tendencia, a intelixencia artificial podería representar máis do 30% do consumo enerxético mundial en 2030.

Ante este escenario, Alonso avogou por un cambio de paradigma cara a unha IA verde e responsable, que aposte por modelos máis lixeiros, enerxeticamente eficientes, explicables e sostibles. Entre as estratexias para lograr este obxectivo, subliñou a importancia de mellorar a calidade dos datos, optimizar os procesos de adestramento e inferencia, e deseñar modelos con menor pegada de carbono.

Traxectoria de referencia internacional

Amparo Alonso Betanzos é Catedrática de Ciencia da Computación e Intelixencia artificial na UDC, onde coordina o grupo de investigación LIDIA (Laboratorio de Investigación e Desenvolvemento en Intelixencia Artificial). Tamén é profesora no Departamento de Psicoloxía da NTNU (Trondheim, Noruega).

A súa investigación céntrase en modelos escalables de aprendizaxe automática, intelixencia artificial explicable e confiable, e Green AI. Foi presidenta da Asociación Española para a Intelixencia Artificial (2013-2021), e é membro senior de IEEE e ACM, así como académica da Real Academia Española de Ciencias Exactas, Físicas e Naturais.

Forma parte do Consello Asesor de Intelixencia artificial do Goberno de España desde 2020 e do Comité de Ética da Investigación do Ministerio de Ciencia, Innovación e Universidades desde 2023. Tamén contribuíu ao deseño da Estratexia Española de I+D+i en Intelixencia artificial en 2018.