• O asesor da UNESCO especializado en ética da IA, Roy Saurabh, falará sobre a aprendizaxe federada, unha tecnoloxía que permite ás institucións colaborar na análise de datos sen necesidade de compartilos directamente.
• A conferencia terá lugar o próximo 10 de abril ás 12:00h na Sala Cloud do CITIC e non é necesario rexistrarse previamente.

A análise de datos sensibles, en particular os que involucran a poboacións vulnerables como os menores, require estritas medidas de privacidade, seguridade e gobernanza ética. Os enfoques tradicionais de procesamento centralizado de datos a miúdo comprometen a soberanía destes datos e dificultan o cumprimento das normas regulatorias. Para afrontar esta situación, existen iniciativas deseñadas para procesar grandes volumes de información, en liña co marco regulatorio internacional e con requisitos éticos sobre abordaxe cuantitativa e cualitativa de datos. Exemplos notables son o proxecto “Good Governance for Children’s Data” de UNICEF ou a arquitectura proposta polo proxecto EDGE da UE.

Dentro deste campo de desenvolvemento, o CITIC da UDC e o Grupo Integrado de Enxeñería (GII) organizan un relatorio impartido por Roy Saurabh, experto en ética da IA e asesor da UNESCO. Saurabh falará sobre a “Integración da aprendizaxe federada con marcos de gobernanza de datos para a análise colaborativa e seguro de datos sensibles”. A conferencia, en inglés, terá lugar o próximo 10 de abril, xoves, ás 12:00h. na Sala Cloud do centro.

Aprendizaxe federada: tratamento descentralizado de datos máis ético e seguro

A aprendizaxe federada (colaborativa) é un tipo de aprendizaxe automática que permite a varias institucións traballar xuntas para adestrar modelos de intelixencia artificial sen necesidade de compartir os datos orixinais. En lugar de enviar a información a un único lugar, cada institución adestra o modelo cos seus propios datos e só comparte os resultados da aprendizaxe. Isto axuda a protexer a privacidade e manter os datos no seu lugar de orixe, cumprindo coas normas de seguridade e gobernanza mentres se aproveita o coñecemento colectivo.

Neste sentido, a conferencia de Roy Saurabh examina os desafíos e os posibles enfoques que permiten a integración da aprendizaxe federada con mecanismos crave de gobernanza de datos, como a privacidade diferencial e a computación multi-partita segura, para reforzar a protección de datos e o cumprimento normativo. Ao combinar os imperativos de gobernanza con metodoloxías analíticas avanzadas, este traballo senta as bases para solucións de análises de datos escalables, éticas e seguras.

Os achados demostran o potencial da aprendizaxe federada para facilitar a toma de decisións baseada en datos en contornas sensibles, promovendo a confianza, a colaboración e a xestión ética de datos sensibles.

IA responsable, eixo da súa traxectoria profesional

Roy Saurabh é asesor sénior da UNESCO e investigador na interacción persoa-ordenador (HCI), as ciencias da aprendizaxe e a ética da IA. O seu campo de actuación aborda a transformación dos sistemas educativos e sanitarios mediante a ciencia cidadá, as tecnoloxías que melloran a privacidade (PET) e as arquitecturas de aprendizaxe federada. A súa actividade académica céntrase en intervencións baseadas na evidencia que defenden a soberanía dos datos, garanten unha gobernanza responsable da IA e fomentan o desenvolvemento humano.

Roy Saurabh traballa tamén no deseño de solucións fiables de avaliación da IA, impulsando a transformación dos sistemas educativos, a monitoraxe da saúde mental e as políticas dixitais. As súas contribucións integran a investigación académica coa implementación práctica, influíndo nos marcos de gobernanza internacional e promovendo innovacións dixitais equitativas.