• O seu obxectivo é modernizar e dixitalizar a fabricación de grandes compoñentes, creando centros de produción máis intelixentes, conectados e autónomos, capaces de adaptarse en tempo real a calquera cambio ou imprevisto.

Europa é líder na fabricación de pezas industriais complexas e de gran tamaño, e España non queda atrás. O sector metalmecánico español creceu máis do 8% nos últimos anos. Isto débese á alta calidade dos seus produtos, a súa personalización, eficiencia e servizos. Con todo, as esixencias cada vez maiores en normativas e calidade están a levar as tecnoloxías actuais ao límite.

Neste contexto nace CASANDRA, un ambicioso proxecto de dixitalización e modernización da fabricación industrial, no que participa o CITIC da Universidade da Coruña, achegando a súa experiencia en intelixencia artificial, ciencia de datos, computación de altas prestacións e redes intelixentes. O proxecto busca transformar as fábricas en espazos máis intelixentes, conectados e autónomos, capaces de adaptarse en tempo real a cambios ou imprevistos. Este impulso tecnolóxico é clave para manter a competitividade do sector metalmecánico español, que creceu máis do 8% nos últimos anos grazas á calidade, personalización e eficiencia dos seus produtos.

Como o vai a lograr?

1. Dixitalización total do proceso: Quérese seguir o “fío dixital” de cada peza, é dicir, ter un rexistro completo desde que se deseña ata que se termina e se entrega, facilitando a trazabilidade e mellorando a calidade.
2. Ferramentas pensadas para as persoas: Desenvolveranse tecnoloxías como robots colaborativos, realidade aumentada e virtual, ou exoesqueletos, para axudar aos traballadores nas súas tarefas, facendo o traballo máis fácil, seguro e eficiente.
3. Fábricas que se adaptan soas: Grazas ao uso de xemelgos dixitais (copias virtuais das pezas e procesos), intelixencia artificial e análise de datos en tempo real, as fábricas poderán axustar os seus procesos automaticamente para mellorar a calidade e reducir erros ou desperdicios.
4. Novas formas de usar a intelixencia artificial: CASANDRA usará tecnoloxías avanzadas como a aprendizaxe federada, IA explicable ou edge computing para que as decisións se tomen máis rápido, de forma máis eficiente e sostible.
5. Demostracións reais: Todo este enfoque probarase en sectores crave como a enerxía e o naval, mostrando como mellora a eficiencia, o control e a calidade na fabricación.

Quen participa?

O proxecto está formado por un grupo de empresas e institucións tecnolóxicas. Firmas como DGH, especializada en automatización e robótica industrial; IDESA, fabricante de grandes equipos para o sector enerxético; e NODOSA Shipyard, referente nacional e internacional en construción e reparación naval.

A elas súmanse ARTSOFT, desenvolvedora de solucións de realidade aumentada e virtual para a industria; TRIMEK, experta en metroloxía dimensional; GOGOA, pioneira en exoesqueletos aplicados a múltiples sectores; e NVISION, que combina IoT, intelixencia artificial e análise de datos para crear ferramentas de monitoraxe e toma de decisións.

O proxecto tamén conta coa participación de centros de investigación punteiros como AIMEN, que destaca polo seu traballo en materiais avanzados, dixitalización e sustentabilidade; o Institut de Robòtica i Informàtica Industrial (IRI), líder en robótica e visión por computador; o CDEI-UPC, centrado en robótica móbil e deseño industrial; o CITIC da Universidade da Coruña, referente en intelixencia artificial, ciberseguridade e ciencia de datos; e INNOVALIA, asociación tecnolóxica vasca con forte proxección internacional.

A iniciativa ten como obxectivo principal transformar as fábricas actuais en contornas intelixentes, máis sostibles e eficientes, a través da aplicación de tecnoloxías emerxentes como a intelixencia artificial, a robótica, a sensórica ou os sistemas ciberfísicos. Esta alianza entre industria e ciencia pretende posicionar a Europa á vangarda da innovación tecnolóxica global.

Este proxecto está financiado pola Axencia Estatal de Investigación (AEI) e subvencionado polo Centro para o Desenvolvemento Tecnolóxico Industrial (CDTI).