O CITIC acolleu o pasado 5 de outubro a reunión inicial dun proxecto da Universidade Nacional de Uzbekistán sobre procesamento da linguaxe natural en lingua uzbeka, no que colaboran os investigadores do centro Carlos Gómez Rodríguez e Elmurod Kuriyozov. O proxecto titúlase “UzUDT: Universal Dependencies Treebank and parser for natural language processing on the Uzbek Language” e foi concedido no marco do compoñente 1 “Improving research excellence and commercialization” da convocatoria Modernizing Uzbekistan National Innovation System Project, financiada polo Banco Mundial.

Á reunión acudiron os investigadores Mukhabbat Kurbanova (co-IP), Sanatbek Matlatipov e Mersaid Aripov (IP), que participou en remoto, ademais de Carlos Gómez Rodríguez e Elmurod Kuriyozov, para poñer en marcha este proxecto que ten o obxectivo de construír corpus anotados sintacticamente en lingua uzbeka, e desenvolver ferramentas de procesamento da linguaxe natural neste idioma baseados en ditos corpus. A duración do proxecto é de dous anos e recibiu un financiamento de máis de 277.000 $.