O investigador do CITIC Pablo Montero foi galardonado con dous premios na competición internacional M4 sobre predición: o primeiro premio ao mellor estudante de doutorado e o segundo premio absoluto, xunto cun equipo da Universidade de Monash coa que participou.

A entrega de premios terá lugar o 10 de decembro en Nova York durante a M4 Conference, organizada pola University of Nicosia e a NYU Tandon School of Engineering, e á que asistirán académicos universitarios de referencia e relatores das principais compañías do mundo de software e tecnoloxía.

O investigador do CITIC competiu xunto con membros da Universidade de Monash (Melbourne), onde Montero realizou a súa estancia de investigación. O método proposto por este equipo conseguiu o segundo premio na categoría absoluta, e Montero obtivo o primeiro premio ao mellor estudante de doutorado por ser o mellor método proposto por un estudante.

A competición M4 está aberta a profesionais e investigadores de todo o mundo, que poden realizar predicións de valores partindo de datos facilitados pola organización. Nesta edición participaron 17 equipos.