O Centro de Investigación en Tecnoloxías da Información e as Comunicacións da Universidade da Coruña recibiu este mércores, 15 de xaneiro, a visita de dous grupos de estudantes de 4º da ESO do IES David Buján de A Coruña.

O alumnado tivo a oportunidade de coñecer as capacidades do centro nun percorrido que destacou as súas avanzadas instalacións e proxectos. Durante as visitas, os estudantes comezaron no Demostrador Tecnolóxico, onde aprenderon sobre solucións innovadoras como simuladores de realidade virtual e aumentada, así como con demostracións de robótica. Ademais, accederon ao Centro de Procesamento de Datos (CPD) e aos laboratorios, onde se explicaron procesos como a impresión 3D e outros desenvolvementos de vangarda. No Laboratorio de Robótica puideron manexar o can robot Unitree Go 1 e o RB-Summit de Robotnik, ademais de aprender sobre os diferentes usos que teñen estes dous desenvolvementos tecnolóxicos.

Esta experiencia formativa busca espertar vocacións científicas e tecnolóxicas, achegando aos mozos e mozas aos retos e oportunidades que ofrece a investigación neste ámbito.

O CITIC reafirma o seu compromiso coa divulgación e o fomento das vocacións tecnolóxicas, especialmente a través de actividades que integran estudantes de diferentes niveis educativos e promoven o interese polo coñecemento en tecnoloxía e innovación.