O subdirector do CITIC, Javier Pereira, participou na mesa redonda final do encontro nacional ComCiRed 2025 (Comunicar Ciencia en Rede), celebrada na Universidade de Cádiz. Esta sesión, dedicada á participación cidadá en ciencia, reuniu a representantes de destacados proxectos estatais e europeos para debater sobre novas formas de implicar á sociedade nos procesos de investigación e xeración de coñecemento.

Pereira compartiu a súa experiencia en comunicación científica e o seu traballo con iniciativas que buscan integrar activamente á cidadanía na ciencia, subliñando a importancia de construír narrativas accesibles e emocionalmente significativas para favorecer unha maior implicación pública. Durante a súa intervención, defendeu a necesidade de ir máis aló da mera transmisión de información, apostando por unha comunicación bidireccional e por proxectos que promovan a corresponsabilidade social nos retos científicos actuais.

A mesa redonda puxo o broche final á segunda e última xornada de ComCiRed 2025, que este ano reuniu en Cádiz a máis dun centenar de profesionais da comunicación científica, representantes de 70 Unidades de Cultura Científica e da Innovación (UCC i) de toda España.

Organizado pola UCC i da Universidade de Cádiz, co apoio da Fundación Española para a Ciencia e a Tecnoloxía (FECYT), este foro consolidouse como un espazo crave para o intercambio de experiencias, a reflexión colectiva e a formación continua dos profesionais que traballan na divulgación científica no noso país.