Os investigadores do CITIC Mariño Rivera e Rubén Pérez participaron do 3 ao 7 de outubro na “Training School on Digital Forensics: evidence analysis via intelligent systems and practices“, organizada pola acción COST DIGforASP en Nápoles (Italia), de forma simultánea co 14º Simposio Europeo sobre Intelixencia Computacional e Matemáticas (European Symposium on Computational Intelligence and Mathematics) ESCIM 2022.

Na sesión “Five Minute Thesis”, Martiño Rivera presentou a súa temática de tese, titulada “Novel EAP Method Based on the FIDO Authentication Protocol”, destacando a importancia dos novos mecanismos de autenticación e as súas implicacións na informática forense. Pola súa banda, Rubén Pérez expuxo a súa temática de tese “Detection of privacy problems in IoT devices based on artificial intelligence”, introducindo o campo de aplicación da Intelixencia Artificial no ámbito dos dispositivos IoT.

Esta escola de formación céntrase na análise forense dixital e, máis concretamente, na análise de probas a través de sistemas e prácticas intelixentes, sendo o público obxectivo estudantes novos/as que queiran adquirir coñecementos e capacidades necesarias para fomentar as sinerxías entre persoal investigador de análise forense dixital, intelixencia artificial e razoamento automatizado e, en paralelo, lograr os obxectivos principais da acción.