A Coruña, 2 de abril de 2025.- No marco do Programa Nacional de Algoritmos Verdes (PNAV), o vindeiro 3 de abril, ás 10:00h, celebrarase o webinar “Ecosistema PNAV: Implicacións éticas, sociais e económicas dos algoritmos verdes”. Nesta sesión, o equipo da Cátedra INDITEX-UDC de IA en Algoritmos Verdes analizará o impacto da intelixencia artificial desde a perspectiva das ciencias sociais.

A Cátedra forma parte do PNAV, un plan xestionado pola Subdirección Xeral de Fomento e Regulación da Intelixencia Artificial, dependente do Ministerio de Transformación Dixital e da Función Pública.

Psicoloxía e Dereito

A sesión abordará esta cuestión desde dúas disciplinas: a Psicoloxía e o Dereito e contará coas aproximacións de dous membros do equipo de investigación da Cátedra e da Universidade da Coruña. Adina Dumitru, especialista en Psicoloxía Evolutiva e da Educación, falará sobre “Barreiras e facilitadores do comportamento pro-ambiental: perspectivas psicolóxicas con aplicación á IA”; na que fará unha análise dos factores que inflúen na adopción de comportamentos sostibles e como integralos no deseño de ferramentas de IA.

Javier Sanz, experto en Dereito Administrativo, presentará o relatorio “Cara a ordenación xurídica dos algoritmos verdes: regulación e/ou autorregulación?”, explorando o marco regulatorio actual e futuro necesario para desenvolver algoritmos con impacto ambiental positivo.

Ademais, a directora da Cátedra e investigadora do CITIC da UDC, Verónica Bolón, fará unha presentación da actividade e dos obxectivos desta iniciativa que forma parte do ecosistema do Programa Nacional de Algoritmos Verdes, destinado a situar España na vangarda da investigación e aplicación de mellores prácticas para o desenvolvemento da IA verde e así contribuír á redución do impacto ambiental das tecnoloxías dixitais.

O Programa está integrado por expertos independentes, universidades, startups, certificadoras, entidades industriais, tecnolóxicas, provedores cloud e organizacións gobernamentais que compartan o seu compromiso coa sustentabilidade.

Para asistir a esta sesión online, só é necesario rexistrarse a través da seguinte ligazón.

Investigación para reducir o impacto ambiental das TIC

A Cátedra INDITEX-UDC de IA en Algoritmos Verdes é unha das 21 cátedras ENIA (Estratexia Nacional en Intelixencia Artificial) concedidas polo Ministerio para a Transformación Dixital e da Función Pública. Dirixida pola investigadora do CITIC, Verónica Bolón,a cátedra busca, a través da investigación reducir o impacto ambiental das aplicacións informáticas, así como o seu uso para atopar solucións sostibles, máis coñecidos como “algoritmos verdes”.

A Cátedra segue catro liñas de investigación:

• Desenvolvemento de algoritmos eficientes a nivel enerxético.
• IA para eficiencia enerxética e desenvolvemento sostible.
• Robótica sostible.
• Estudo das implicacións éticas, sociais e económicas dos algoritmos verdes.

O equipo de persoas que forman parte da cátedra está composto por 20 membros, 16 dos cales están adscritas ao Centro de Investigación en Tecnoloxías da Información e as Comunicacións da UDC (CITIC).