A investigadora Paula de Santos Dorrego, terapeuta ocupacional do Proxecto TICARE do CITIC da UDC, representou ao centro no I Congreso Internacional do Consello Xeral de Colexios de Terapeutas Ocupacionais (CGCTO), celebrado en Madrid do 22 ao 24 de maio. Durante o encontro, dirixiu un obradoiro práctico centrado no uso da impresión 3D para o deseño e creación de produtos de apoio personalizados.

No transcurso do obradoiro, celebrado o día 23, a investigadora amosou o potencial desta tecnoloxía como ferramenta innovadora na práctica profesional da terapia ocupacional, presentando exemplos reais desenvolvidos no ámbito do CITIC. Estes produtos, pensados para mellorar a accesibilidade e a participación das persoas con discapacidade, exemplifican o impacto positivo da colaboración entre tecnoloxía e atención sociosanitaria.

Como recoñecemento ao esforzo investigador, deseñouse e imprimiuse en 3D un agasallo conmemorativo, entregado ás persoas autoras da mellor comunicación oral e do mellor póster científico do congreso, como símbolo da unión entre tecnoloxía e accesibilidade.

A participación neste congreso internacional reforza o papel do CITIC como referente na aplicación de tecnoloxías emerxentes ao servizo da sociedade, consolidando a súa achega á mellora da calidade de vida de tódalas persoas.