• “Education and Dixital Literacy to Grow Inclusive Talents”, liderado polo CITIC da Universidade da Coruña será financiado con 400.000 euros a través do programa Erasmus+ na convocatoria de 2024.
• O proxecto está formado por outras 6 institucións de 5 países diferentes ademais do CITIC da UDC.

 A Coruña, 20 de setembro de 2024.- A versión internacional do proxecto Talentos Inclusivos “EDIGIT: Education and Dixital Literacy to Grow Inclusive Talents”, liderado polo Centro de investigación en Tecnoloxías da Información e as Comunicacións (CITIC) da Universidade da Coruña (UDC), será financiado con 400.000 euros a través do programa Erasmus+  na convocatoria de 2024. Esta iniciativa foi escollida entre as 34 seleccionadas da “Acción Clave 2 – Cooperación entre organizacións e institucións”, dentro da categoría “Asociacións de cooperación en Educación Escolar (KA220-SCH)” dun total de 205 solicitudes presentadas.

O obxectivo xeneral de EDIGIT é abordar a falta de inclusión das persoas con discapacidade na transición dixital a través da promoción de enfoques e prácticas inclusivas no ensino STEM, aumentando a concienciación dos estudantes sobre a discapacidade. Para iso, a base do proxecto céntrase en dotar aos docentes das competencias necesarias para desenvolver iniciativas centradas na inclusión no ensino das STEM.

O proxecto está formado, xunto co CITIC da UDC, por outras 6 institucións de 5 países diferentes: Academia José Moreira da Silva, Cooperativa de Estudos de Economía Social (Portugal); Kezenfogva Osszefogas A Foyatekosokert Alapitvany (Hungría); Gymnázium Jiřího Gutha-Jarkovského (República Checa); ASPACE Coruña (España); Polo Europeo della Conoscenza – IC Bosco Chiesanuova (Italia) e On Projects Advising SL (España).

Tal e como apunta o subdirector do CITIC Javier Pereira, que lidera o proxecto: “É un recoñecemento e posta en valor do traballo desenvolvido desde hai xa cinco anos da man de ASPACE Coruña co proxecto Talentos Inclusivos. Desde os seus inicios, en plena pandemia, contamos co financiamento da FECYT e co apoio do Consello Social da UDC, o Concello da Coruña e a Xunta de Galicia. Este ano mobilizamos 15 centros educativos de toda Galicia e contamos coa participación de case 400 estudantes. Esta axuda supón un novo reto para unha organización internacional coa implicación de 5 países”.

Sobre Erasmus+

Erasmus+  é o programa da UE que apoia a educación, a formación, a mocidade e o deporte en Europa. Para o período 2021-2027, o programa fai especial fincapé na inclusión social, a dobre transición ecolóxica e dixital e o fomento da participación das persoas mozas na vida democrática.

Apoia as prioridades e actividades establecidas no Espazo Europeo de Educación, o Plan de Acción de Educación Dixital e a Axenda de Capacidades Europea. Ademais, o programa:

• apoia o piar europeo de dereitos sociais,
• aplica a Estratexia da UE para a Mocidade 2019-2027,
• desenvolve a dimensión europea do deporte.

Sobre Talentos Inclusivos

Talentos Inclusivos é un proxecto desenvolvido polo CITIC da UDC e ASPACE Coruña, e que conta co apoio da Fundación Española para a Ciencia e a Tecnoloxía (FECYT) do Ministerio de Ciencia, Innovación e Universidades; o Consello Social da UDC; o Concello da Coruña e a Xunta de Galicia a través das Consellerías de Educación, Ciencia, Universidades e FP e Política Social e Igualdade. 

O seu obxectivo é espertar vocacións STEM (Science, Technology, Engineering and Mathematics) entre os mozos e dar a coñecer a realidade da discapacidade a través de equipos colaborativos de traballo para resolver retos tecnolóxicos expostos por persoas con parálise cerebral.

A través deste proxecto, alumnos e alumnas de secundaria e bacharelato de diversos institutos de Galicia, teñen que buscar solucións tecnolóxicas a unha serie de retos que serán propostos por usuarios da entidade ASPACE Coruña, Amencer-ASPACE e da Asociación de familias de persoas con parálise cerebral (APAMP).

 Máis información:  https://talentosinclusivos.citic.udc.es/s