• Durante tres días, os participantes procedentes de entidades nacionais e internacionais traballarán en equipo para abordar desafíos prácticos relacionados coas necesidades diarias das persoas con discapacidade.
• A competición forma parte do proxecto Erasmus+ Design2Freedom, coordinado pola Confederación Española de Persoas con Discapacidade (COCEMFE) coa participación do grupo Talonis do CITIC.

A Coruña, 03 de decembro 2024. – O Centro de Investigación en Tecnoloxías da Información e as Comunicacións da Universidade da Coruña acolle desde o luns ata o mércores un hackaton europeo que reunirá a equipos de traballo multidisciplinarios para desenvolver solucións innovadoras que melloren a calidade de vida das persoas con discapacidade. Organizado polo CITIC da Universidade da Coruña co apoio da Confederación Española de Persoas con Discapacidade Física e Orgánica (COCEMFE), este evento conta coa participación de entidades internacionais como Vilniaus Kolegija (Lituania), Creative District (Bélxica) e Technicka Univerzita v Kosiciach (Eslovaquia), ademais de autonómicas como Confederación Galega de Persoas con Discapacidade (COGAMI) e Asociación de Pais de Persoas con Parálise Cerebral (ASPACE Coruña).

Durante tres días intensivos, os participantes traballarán en equipo para abordar desafíos prácticos relacionados coas necesidades diarias das persoas con discapacidade. Estes retos, identificados polas propias persoas con discapacidade en colaboración cos socios europeos e as entidades colaboradoras, inclúen a creación de ferramentas e dispositivos que promovan a independencia e a inclusión, como adaptacións para persoas usuarias de cadeiras de rodas, un abrelatas multifuncional que poida manexarse cun só brazo, e solucións tecnolóxicas que melloren a accesibilidade.

Entre os desafíos máis destacados atópase o deseño dun dispositivo que permita regular a temperatura en días calorosos para persoas en cadeiras de rodas, así como un lector de cartas para xogos de mesa dirixido a persoas con baixa visión. Ademais, presentaranse propostas de software compatibles con lectores de pantalla e alternativas para previr a atrofia muscular en brazos e mans.

Este hackaton é unha oportunidade única para que equipos conformados por persoas con diversidade e profesionais de diferentes disciplinas colaboren e utilicen a tecnoloxía para mellorar a vida cotiá de todas as persoas. A iniciativa reflicte un compromiso firme cara á inclusión e o deseño centrado na persoa, apoiando a creación de solucións prácticas e accesibles para todos.

Mellorar a accesibilidade a través da tecnoloxía

O hackaton que acolle esta semana o CITIC forma parte do proxecto Erasmus+ Design2Freedom, coordinado por COCEMFE, cuxo obxectivo é promover a accesibilidade e a inclusión de persoas con discapacidade mediante o uso de tecnoloxías. O grupo de investigadoras do CITIC, que participa neste proxecto, está comprometido coa investigación e o desenvolvemento de solucións tecnolóxicas accesibles. Nas actividades previas do proxecto, como as xornadas formativas celebradas en Madrid, o Grupo TALIONIS da UDC compartiu a súa experiencia en áreas como impresión 3D, software de comunicación e ferramentas para a creación de contidos dixitais accesibles.

A iniciativa reflicte o firme compromiso do CITIC cara á inclusión, o deseño centrado na persoa e o desenvolvemento de solucións tecnolóxicas que poidan ter un impacto positivo na vida cotiá das persoas con discapacidade. A colaboración entre universidades, investigadores e entidades sociais internacionais contribuirá á creación dunha contorna máis accesible e equitativo para todas as persoas.