Un equipo de investigadores e investigadoras do CITIC da UDC composto por Adriana Dapena, Paula Castro, Óscar Fresnedo e Lucas Alonso foi distinguido con dous galardóns e un nomeamento no marco das XXXI Xornadas sobre o Ensino Universitario da Informática (JENUI 2025), celebradas en Valladolid.

O seu traballo, centrado na innovación e investigación educativa aplicada ao ensino universitario da informática, foi recoñecido co Premio da Comisión da Muller en Informática da  Sociedade Científica Informática de España (SCIE), que distingue o mellor estudo que aborda a perspectiva de xénero no ámbito da informática. Este recoñecemento pon en valor os esforzos do equipo por fomentar un ensino máis inclusivo, equitativo e sensible á diversidade.

Ademais, o proxecto recibiu o Premio do Consello Xeral de Colexios Oficiais de Enxeñaría en Informática, que recoñece o mellor traballo relacionado coa ética e o exercicio profesional na enxeñaría informática presentado nas JENUI 2025. Esta distinción subliña a relevancia do estudo na formación de futuros profesionais con conciencia ética e responsabilidade social.

Así mesmo, o traballo foi nomeado a mellor artigo da conferencia, unha mención que destaca a súa excelencia académica, orixinalidade e contribución significativa ao avance do ensino da informática no ámbito universitario.