• Poderán participar estudantes que defendesen o seu TFG ou TFM durante o curso académico 2025/2026 e que obtivesen unha cualificación mínima de notable.
• A presentación de candidaturas realizarase a través do seguinte formulario: https://forms.office.com/e/ialelvc8ms.

A Coruña, 30 de marzo de 2026.- A Universidade da Coruña abriu a convocatoria dos Premios Paula Montoto Castelao 2025-2026, impulsados pola Cátedra Denodo – UDC de Enxeñería de Datos, Intelixencia Artificial e Innovación Tecnolóxica. Estes galardóns buscan recoñecer os mellores Traballos de Fin de Grao e de Máster en áreas como Enxeñería Informática, Ciencia de Datos, Intelixencia Artificial e disciplinas afíns.

A Cátedra Denodo–UDC, xestionada a través da Fundación CITIC de Galicia, distinguirá traballos que destaquen pola súa excelencia académica, innovación tecnolóxica e aplicabilidade na contorna empresarial, contribuíndo ao avance científico, tecnolóxico e profesional. Poderán participar estudantes que defendesen o seu TFG ou TFM durante o curso académico 2025/2026 e que obtivesen unha cualificación mínima de notable. Os traballos serán avaliados en función de criterios como a orixinalidade, a calidade técnica e metodolóxica, a súa capacidade de transferencia ao ámbito empresarial e a súa contribución á transformación dixital ou ao desenvolvemento sostible.

A convocatoria establece tres premios cunha dotación económica de 5.000 euros para o primeiro, 3.000 euros para o segundo e 2.000 euros para o terceiro. A comisión avaliadora estará integrada por representantes académicos da UDC e profesionais de Denodo.

As candidaturas deberán presentarse en formato dixital, incluíndo a memoria do traballo, un resumo executivo e a acreditación do seu defensa e cualificación. O prazo de presentación permanecerá aberto ata o 1 de outubro de 2026.

Os Premios Paula Montoto Castelao nacen como homenaxe a quen foi docente da UDC e figura clave en Denodo, recoñecendo non só a súa contribución ao desenvolvemento tecnolóxico, senón tamén o seu papel como mentora de numerosas xeracións de profesionais do sector.

A Cátedra Denodo-UDC

A Cátedra Denodo–UDC de Enxeñería de Datos, Intelixencia artificial e Innovación Tecnolóxica xorde da colaboración entre a Universidade da Coruña e Denodo co obxectivo de promover a excelencia académica e reforzar a conexión entre a formación universitaria e as necesidades reais da contorna profesional.

A Cátedra está xestionada a través da Fundación CITIC de Galicia. Está dirixida por José Losada, profesor de Ciencias da Computación na Facultade de Informática da UDC, onde imparte docencia nos graos de Enxeñería Informática e no de Ciencia e Enxeñería de Datos; e investigador do CITIC.

Sobre o CITIC

O CITIC é un centro de investigación que potencia o avance e a excelencia en I+D+i aplicada ás TIC, creado en 2008 pola Universidade da Coruña. A actividade científica do centro estrutúrase en catro áreas de investigación principais: Intelixencia artificial; Ciencia e Enxeñería de Datos; Computación de Altas Prestacións; e Servizos e Redes Intelixentes, e unha área de investigación transversal a todas elas: a de Ciberseguridade. 

O CITIC está acreditado como Centro de Excelencia e membro da Rede CIGUS para o período 2024-2027, o que avala a calidade e impacto da súa investigación. A acreditación, estruturación e mellora do CITIC está cofinanciada pola Xunta de Galicia e nun 60% pola Unión Europea no marco do Programa Operativo FEDER Galicia 2021-2027, co obxectivo temático de promover “unha Europa máis intelixente: transformación económica innovadora e intelixente” (ED431G 2023/01).