A investigadora do CITIC Verónica Bolón modera un seminario con motivo do Día da Muller e a Nena na Ciencia
05/02/2021 – CITIC
A investigadora do CITIC Verónica Bolón moderará o seminario “Xeración de coñecemento desde unha perspectiva de xénero”, organizado con motivo do Día da Muller e a Nena na Ciencia pola Academia Joven de España (AJE), entidade na que Verónica Bolón é académica de número.
O seminario realizarase de forma online o próximo 12 de febreiro en horario de 17:00 a 18:00 horas e terá como relatoras á directora de Identidade Dixital da Universidade de Deusto, Lorena Fernández Álvarez, e a directora do Instituto de Filosofía do CSIC, Concha Roldán.
O seminario persegue uns dos obxectivos da Academia Nova de España, que pasa pola promoción e a visibilización da ciencia incorporando a perspectiva de xénero.
O Día Internacional da Muller e a Nena na Ciencia celébrase cada ano o 11 de febreiro co fin de lograr o acceso e a participación plena e equitativa na ciencia para as mulleres e as nenas, promovendo o seu empoderamento e buscando a igualdade de xénero.
