A Real Academia Nacional de Medicina de España (RANM) acolleu o pasado 18 de marzo unha sesión científica extraordinaria baixo o título “As Academias e a IA: fundamentos científicos da IA médica”, un encontro que reuniu a destacados expertos nacionais e internacionais en intelixencia artificial aplicada ao coidado da saúde. Coordinada polo profesor Víctor Maojo, a xornada contou coa participación de académico e investigador do CITIC Alejandro Pazos.

Entre os protagonistas internacionais estiveron pioneiros da IA médica como Robert A. Greenes, da University of California en San Diego, Arizona State University e Harvard Medical School, especializado en sistemas de apoio á toma de decisións clínicas; Casimir A. Kulikowski, de Rutgers University, creador do sistema de redes causais CASNET; Edward H. Shortliffe, vinculado a Columbia University, Arizona State University e Stanford University, desenvolvedor de sistemas expertos como MYCIN e ONCOCIN; e Peter Szolovits, do MIT, líder en sistemas de decisión clínica colaborativos. Durante máis de tres horas, os expertos compartiron as súas experiencias pioneiras desde os anos 60 e 70, mostrando como aquelas ideas innovadoras sentaron as bases para a intelixencia artificial médica actual.

A sesión abordou os fundamentos científicos da IA médica, destacando que non se trata soamente de tecnoloxía, senón de coñecemento científico construído a partir de décadas de investigación. Analizáronse temas clave como a integración da IA na investigación biomédica, a formación do persoal médico do futuro, que debe desenvolver o seu traballo nun contexto sanitario cada vez máis dixital e asistido por IA. Subliñaron a adaptación de hospitais e centros de atención primaria a estas contornas dixitais, integrando estas ferramentas de forma ética e segura. Ademais, analizáronse as oportunidades e riscos que expón a medicina asistida por IA, desde a mellora no diagnóstico e a personalización de tratamentos ata os desafíos éticos e de responsabilidade clínica.

O acto foi inaugurado por Eduardo Díaz-Rubio, presidente da RANM, onda Miguel López-Valverde, conselleiro de Dixitalización da Comunidad de Madrid e Ignacio Para Rodríguez-Santana, presidente da Fundación Bamberg. Clausúraa estivo a cargo de Nuria Ruiz, directora xeneral de Saúde Dixital da Comunidad de Madrid, e de Víctor Maojo, quen destacou a relevancia da IA como ferramenta científica cun impacto crecente na medicina contemporánea.