O CITIC recibiu esta mañá a visita dun grupo de alumnos e alumnas dos ciclos de Desenvolvemento de aplicacións web e Sistemas microinformáticos e redes do IES A Pinguela de Monforte de Lemos.

A visita comezou cunha presentación do centro e as súas liñas de investigación da man do subdirector Javier Pereira e o investigador José A. Iglesias Guitián. A continuación, acudiron ao dronelab de Avansig, empresa situada no CITIC. O socio e director da empresa, David Trillo, explicou aos asistentes os proxectos nos que actualmente están traballando na liña de negocio relacionada cos drones.

Posteriormente, o responsable da unidade de sistemas do CITIC, Alejandro Mosteiro, explicoulles o funcionamento do Centro de Procesamento de Datos (CPD). Para finalizar, os estudantes visitaron a sala de demostradores tecnolóxicos, onde coñeceron diferentes proxectos desenvolvidos no centro.