As investigadoras do CITIC da UDC, Paula Castro e Adriana Dapena, impartiron recentemente un obradoiro titulado “Sinais e Sensores” na Fundación ADCOR da Coruña, dentro do proxecto tuTIC: Tecnoloxía, Inclusión e Creatividade. Esta iniciativa de Aprendizaxe-Servizo (ApS) busca establecer pontes entre a formación universitaria e o terceiro sector, a través do desenvolvemento de proxectos tecnolóxicos vinculados ás materias do Grao en Enxeñaría Informática da Universidade da Coruña.

O alumnado de terceiro curso da mención en Enxeñaría de Computadores afondou no procesamento de son e no deseño de interfaces accesibles, co obxectivo de crear solucións inclusivas. Como resultado, desenvolvéronse varios xogos musicais e un piano interactivo baseado en sensores de ultrasóns, que foron compartidos coas persoas usuarias da Fundación ADCOR.

Premio á innovación docente

A colaboración entre universidade e entidades sociais tivo tamén recoñecemento institucional. Recentemente, a investigadora Adriana Dapena recibiu o segundo premio na categoría de Redución das Desigualdades nos IV Premios a Proxectos de Innovación Docente con Aprendizaxe-Servizo da UDC. Este galardón destacou o seu labor como titoría dun traballo de fin de grao, no que se desenvolveu unha aplicación dirixida a persoas con Trastorno do Espectro Autista (TEA) para traballar aspectos como as rutinas, os sentimentos e a ironía. Este proxecto foi tamén recoñecido pola Cátedra NTT Data no Congreso XoveTIC.

Estas accións amosan o compromiso das investigadoras do Centro de Investigación TIC (CITIC) co modelo ApS como ferramenta para achegar a tecnoloxía ás persoas, especialmente a colectivos con diversidade funcional. Parte destes proxectos foron tamén presentados na exposición polo 10º aniversario do Aprendizaxe-Servizo na UDC, celebrada recentemente en Ferrol.