Do día 23 ao 28 de xullo levouse a cabo en Copenhague, Dinamarca, a “25th International Conference on Human-Computer Interaction” (HCI International); un evento internacional que reúne a expertos, investigadores e profesionais de todo o mundo no campo da interacción persoa-ordenador e disciplinas relacionadas. 

Ao congreso acudiu o investigador Manuel Lagos Rodríguez, que presentou en formato póster dous traballos sobre Realidade Virtual (RV) aplicada a persoas con discapacidade. Os pósteres foron “Visiting Supermarket through Virtual Reality: an Opportunity for Rehabilitation of People with Disability” e “User Experience in Virtual Reality from People with and without Disability”. 

“Visiting Supermarket through Virtual Reality: an Opportunity for Rehabilitation of People with Disability” pretende desenvolver unha aplicación en Realidade Virtual que axude no proceso de rehabilitación de persoas con discapacidade mediante a inmersión destes usuarios nun supermercado. Para moitas persoas, este proceso de recuperación pode ser longo, monótono e pouco motivador, xa que con frecuencia as accións para realizar implican movementos ou exercicios mecánicos e repetitivos, sen conexión directa coas actividades da vida cotiá. Para axudar no devandito proceso e evitar un posible abandono, a aplicación ofrecerá actividades dinámicas e amenas para adestrar tanto habilidades físicas como cognitivas. 

O obxectivo da investigación “User Experience in Virtual Reality from People with and without Disability” é analizar e determinar, desde a perspectiva dos usuarios finais de aplicacións xenéricas de RV, as posibilidades que ofrecen as mesmas á hora de mergullarse en diversos escenarios virtuais. E é que estas aplicacións fóronse introducindo progresivamente nas intervencións sanitarias, especialmente nas centradas na rehabilitación de persoas con discapacidade, sen embargo, presentan problemas diversos como a falta de usabilidade.