CITIC

Marcos Ortega e Jorge Novo presentaron os seus avances para o diagnóstico de COVID-19 ao Servizo de Radioloxía do CHUAC

15/07/2020

Os investigadores do CITIC Marcos Ortega e Jorge Novo presentaron recentemente ao Servizo de Radioloxía do Complexo Hospitalario Universitario da Coruña (CHUAC) os seus avances acadados en materia de sistemas automáticos de apoio ao diagnóstico de COVID-19 baseados en imaxe radiolóxica mediante o uso de técnicas de intelixencia artificial como a aprendizaxe profunda. Esta ferramenta é capaz de distinguir entre individuos sen sintomatoloxía, pacientes con sintomatoloxía compatible con pneumonía ou outras afectacións pulmonares e aqueles cuxa sintomatoloxía específica é compatible con COVID-19.

Os desenvolvementos realizados permiten obter resultados moi fiables mesmo en imaxes de baixa calidade provenientes de dispositivos de radiografía portátiles, o que aumenta a utilidade do sistema ao ser ideal para utilizar en servizos de urxencia, cribados ou ata en UCI, escenarios onde a mobilidade reducida e a necesidade de inmediatez na toma de decisións son aspectos clave no diagnóstico e seguimento do paciente.

Na reunión aproveitouse ademais para avanzar nas vías de colaboración establecidas entre os investigadores do CITIC e do CHUAC. Así mesmo, comezouse xa coa planificación da implantación da solución de apoio ao diagnóstico nos sistemas do hospital de cara a mellorar a capacidade de resposta e seguimento ante posibles situacións de urxencia en relación coa crise do COVID-19.

A ferramenta xa está dispoñible para uso de xeito online en xray4covid.citic.udc.es. Cómpre destacar que, a diferenza de moitas iniciativas similares, integra métodos especificamente adestrados para imaxes de dispositivos portátiles. Ademais, estes desenvolvementos foron  validados baixo a colaboración de especialistas do servizo de radioloxía do CHUAC.

Os resultados preliminares dos desenvolvementos realizados pódense consultar en:

 

https://www.medrxiv.org/content/10.1101/2020.05.01.20087254v1

https://www.medrxiv.org/content/10.1101/2020.06.18.20134593v1