Converter A Coruña na capital mundial da música creada con intelixencia artificial é o obxectivo do AI Song Contest 2023, coñecido como a Eurovisión da IA, que terá lugar no CSA da Cidade das TIC o vindeiro 4 de novembro. Un evento ó que se une o CITIC da UDC para dar a coñecer o potencial da IA en diferentes campos creativos e artísticos como o da música.

A cita deste ano leva por lema “Walking With AI” (O Camiño da IA) e celebra a diversidade de xeitos de traballar a intelixencia artificial na música no panorama internacional, cos artistas no centro do proceso de composición.

Desde hoxe e ata o 4 de setembro, convídase a artistas, afeccionados da IA e outros perfís vencellados á innovación cultural de todo o mundo a presentar a súa composición co-creada con IA. Deste xeito, a organización agarda recibir composicións musicais de todos os xéneros, desenvolvidas conxuntamente por equipos multidisciplinares compostos por músicos, técnicos ou enxeñeiros con axuda da IA.

Máis información sobre prazos, programación e contido, na web do evento: https://www.aisongcontest.com/