• Oito institucións de Europa e América traballan de maneira coordinada desde o CITIC para deseñar modelos precisos que se aplicarán a fenómenos como o fluxo de lava e o transporte de fármacos en tecidos
• O proxecto InNoPor desenvolve novas ferramentas para comprender como flúen líquidos complexos a través de materiais porosos, o que facilita a optimización de procesos enerxéticos e a limpeza de espazos contaminados

A Coruña, 5 de febreiro de 2026

Un novo proxecto, coordinado por María González Taboada, investigadora do CITIC da UDC, centro da Rede CIGUS da Xunta de Galicia, busca desenvolver novas estratexias numéricas para entender e predicir como se comportan os fluídos non newtonianos en materiais porosos, como rocas ou tecidos biolóxicos. Este tipo de fluídos, que inclúe desde mesturas viscoelásticas ata fluídos con propiedades que cambian co tempo, é difícil de estudar, pero a súa análise é fundamental para múltiples campos científicos e industriais.

Os avances que achega o proxecto InNoPor, do programa Marie Skłodowska-Curie Actions (MSCA), serán clave para optimizar procesos enerxéticos, mellorar técnicas de remediación ambiental —é dicir, as accións destinadas a limpar e restaurar lugares contaminados para protexer a saúde e a contorna— e anticipar fenómenos naturais como a dispersión de cinza volcánica ou o fluxo de coadas de lava. Ademais, o proxecto terá impacto en aplicacións biomédicas, por exemplo, na administración eficiente de medicamentos en tecidos complexos.

O consorcio internacional, formado por oito institucións de Europa e América, traballará en conxunto durante os próximos anos para deseñar modelos matemáticos e algoritmos máis precisos e robustos. Desenvolverase un software de código aberto que integrará estes avances e validarase con datos reais, como os fluxos de lava ocorridos na Palma en 2021. Así mesmo, o proxecto contempla estudar fenómenos que involucran múltiples fases e efectos térmicos, o que abrirá a porta a aplicacións aínda máis complexas.

As entidades que participan neste proxecto son a University of Strathclyde (UK), RWTH Aachen (Alemaña), Kiel University (Alemaña), WIAS Berlin (Alemaña), IGME-CSIC (España), Universidade de Concepción (Chile) e Universidade do Bio-Bio (Chile).

Sobre o CITIC

O CITIC é un centro de investigación que potencia o avance e a excelencia en I+D+i aplicada ás TIC, creado en 2008 pola Universidade da Coruña. A actividade científica do centro estrutúrase en catro áreas de investigación principais: Intelixencia artificial; Ciencia e Enxeñería de Datos; Computación de Altas Prestacións; e Servizos e Redes Intelixentes, e unha área de investigación transversal a todas elas: a de Ciberseguridade. 

O CITIC está acreditado como Centro de Excelencia e membro da Rede CIGUS para o período 2024-2027, o que avala a calidade e impacto da súa investigación. A acreditación, estruturación e mellora do CITIC está cofinanciada pola Xunta de Galicia e nun 60% pola Unión Europea no marco do Programa Operativo FEDER Galicia 2021-2027, co obxectivo temático de promover “unha Europa máis intelixente: transformación económica innovadora e intelixente” (ED431G 2023/01).