O CITIC participará na Maker Faire Galicia presentando dous proxectos e organizando unha mesa redonda e un hackathon
19/05/2022 – CITIC
O CITIC participará, un ano máis, na Maker Faire Galicia, a maior da península, tanto en número de xornadas como en asistentes e proxectos presentados. Esta edición, que se desenvolverá do 1 ao 5 de xuño, contará cun variado programa e a participación de especialistas en distintas áreas de coñecemento que compartirán contidos e proxectos relacionados coa innovación social e cultural, a innovación educativa e a innovación empresarial. Un punto de encontro para a creatividade e o talento cuxo programa se dividirá en tres bloques: xornadas da industria (1 e 2 de xuño), xornada educativa (3 de xuño) e xornadas abertas (4 e 5 de xuño).
O CITIC participará presentado dous proxectos, organizando unha mesa redonda sobre o seu proxecto Talentos Inclusivos e un hackathon de tecnoloxías de apoio:
ROBOT ASISTENTE PARA A REHABILITACIÓN DA MARCHA EN PERSOAS CON DIVERSIDADE FUNCIONAL
Autor: Manuel Lagos, en colaboración con profesionais e usuarios de ASPACE Coruña.
Descrición: O robot é capaz de asistir a persoas con diversidade funcional nas súas sesións terapéuticas de rehabilitación. En concreto, o robot realiza un roteiro, previamente programado por un terapeuta, de modo que o usuario deberá seguilo coa finalidade de completar o devandito percorrido. Durante a execución do percorrido, o robot detectará a posición do usuario, adaptando a súa velocidade ao paso do mesmo. Para o desenvolvemento deste proxecto utilizouse un robot TurtleBot3 e o framework para aplicacións robóticas ROS. Así mesmo, implementouse un sistema SLAM de navegación para executar o roteiro deseñado.
PICTOCAL
Autores: Francisco Laport, Paula Castro e Adriana Dapena.
Descrición: PictoCal é unha aplicación web deseñada e desenvolvida para que familias, educadores e terapeutas poidan elaborar calendarios que resulten atractivos a nenos e persoas con diversidade cognitiva. Os calendarios utilizan fotos, pictogramas ou descricións sinxelas, de forma que os usuarios poidan identificar facilmente a tarefa para realizar. Trátase dunha plataforma con alta demanda por parte das entidades que traballa con persoas con diversidade cognitiva, xa que actualmente esta tarefa realízase manualmente. O acceso á páxina web é aberto e gratuíto, previo rexistro.
MESA REDONDA: TALENTOS INCLUSIVOS
Relatores:
- Javier Pereira Loureiro, subdirector do CITIC e coordinador do proxecto.
- Jesús Spósito, Secretario do Consello Social da Universidade da Coruña.
- Carlos Rodríguez, usuario de ASPACE Coruña e membro dun equipo de traballo do proxecto.
- Manuel F. González Penedo, director do CITIC e catedrático de IA na UDC.
- Patricia Hermida Galán, profesora do IES de Ortigueira.
Data: 3 de xuño de 2022, de 12:45 a 13:30 horas, de modo presencial.
HACKATHON DE TECNOLOXÍAS DE APOIO
Este hackathon, organizado polo CITIC, ASPACE Coruña, ONCE e COGAMI, consistirá na resolución dun reto co obxectivo de facilitar e mellorar o día a día das persoas con diversidade funcional.
Data: Do 1 ao 5 de xuño durante a Maker Faire Galicia 2022, tanto en liña como presencial.
