O subdirector do Centro de Investigación en Tecnoloxías da Información e as Comunicacións da UDC, Javier Pereira Loureiro, participou recentemente no Congreso ATIA 2025, celebrado en Orlando, Florida, do 30 de xaneiro ao 1 de febreiro de 2025, con modalidade presencial e virtual.

A Assistive Technology Industry Association (ATIA), líder en tecnoloxía de asistencia, mellora a vida das persoas con discapacidade a través de solucións innovadoras. O seu congreso anual reúne a expertos, profesionais, educadores e persoas con discapacidade para compartir coñecementos e avanzar nun futuro inclusivo.

Neste contexto, Javier Pereira presentou o proxecto “Talentos Inclusivos”, desenvolvido por CITIC en colaboración con ASPACE Coruña en colaboración coa Fundación Española para a Ciencia e a Tecnoloxía (FECYT). A iniciativa fomenta o interese dos mozos polas disciplinas STEM (Ciencia, Tecnoloxía, Enxeñería e Matemáticas) e sensibiliza sobre a discapacidade, creando equipos colaborativos que resolven retos tecnolóxicos propostos por persoas con parálise cerebral.

A participación en ATIA 2025 permitiu ao CITIC compartir os avances do proxecto coa comunidade internacional, subliñando a importancia da inclusión e a innovación en tecnoloxía asistida. O evento tamén facilitou o intercambio de experiencias e a creación de novas colaboracións para seguir desenvolvendo solucións tecnolóxicas que melloren a vida das persoas con discapacidade.

Para máis información sobre “Talentos Inclusivos”, visita a súa páxina web oficial: talentosinclusivos.citic.udc.es.