Este venres 11 de febreiro, Día Internacional da Muller e a Nena na Ciencia, un grupo de 13 alumnos e alumnas de bacharelato do IES de Ortigueira visitou o CITIC xunto coa súa profesora de Tecnoloxía.

A visita comezou no Demostrador Tecnolóxico cunha presentación do centro e as súas capacidades por parte do subdirector Javier Pereira. Posteriormente, o grupo realizou unha visita guiada polas instalacións do centro, centrada especialmente no CPD (Centro de Proceso de Datos), da man do responsable da unidade de sistemas, Alejandro Mosteiro, que explicou o seu funcionamento.

A continuación, a investigadora Adriana Dapena ofreceu un taller de electromagnetismo, no que os e as estudantes puideron coñecer principios básicos nesta área e a súa aplicación en diferentes ámbitos como o control do tráfico vehicular. Ademais, Dapena incidiu na importancia da interdisciplinariedade no TIC, explicando a combinación de diferentes especialidades e materias para o desenvolvemento da actividade investigadora. Tamén puxo en valor a presenza feminina na ciencia e, en concreto, na informática.

Para finalizar, o alumnado tivo a oportunidade de coñecer e probar diferentes proxectos expostos no Demostrador Tecnolóxico nos ámbitos da robótica e a realidade virtual, xunto co investigador Adrián Xuíz.