Do 27 ao 29 de maio celebráronse en Sevilla as “IX Xornadas Nacionais de Investigación en Ciberseguridade” (JNIC), organizadas polo INCIBE en colaboración coa Escola Técnica Superior de Enxeñería Informática e a Universidade de Sevilla. Nestas xornadas presentaron resultados os investigadores do CITIC Rubén Pérez Jove e David Soler García, pertencentes a os grupos RNASA-IMEDIR e LIA2, respectivamente. 

Rubén Pérez presentou o traballo “Towards TabTransformer-based Operating System Fingerprinting: A Preliminary Approach using the Nmap Database”, realizado en colaboración cos seus directores de teses, Jose Vázquez Naya e Alejandro Pazos. Durante o relatorio presentou os últimos resultados da súa investigación centrada na aplicación de novos métodos de Intelixencia artificial (IA) á ciberseguridade, concretamente ao fingerprinting de sistemas operativos. Esta técnica permite a identificación da familia e versión de sistema operativo dun dispositivo a partir do tráfico de rede, unha tarefa fundamental no campo da seguridade de rede.  

David Soler expuxo o traballo “Privacidade na distribución clásica de claves cuánticas mediante zk-SNARKs”, no que se presenta un protocolo para distribuír de maneira privada material de clave de alta entropía xerado por QRNG a usuarios finais. A inclusión da ferramenta criptográfica zk-SNARK permite ocultar ao servidor a identidade dos clientes, de forma que non saiba quen recibe cada clave.