Sesión "especial estancias" dos almorzos TIC Talk
13/07/2023 - CITIC
Este martes 11 de xullo celebrouse a décimo cuarta edición dos almorzos TIC Talk cunha sesión especial na que participaron investigadores que se atopan de estancia na UDC.
A primeira das charlas impartiuna Adrián Inés, investigador da Universidade da Rioxa, que expuxo o seu traballo: “Simplificando o uso e a construción de modelos de Deep Learning para a clasificación de imaxes”, centrado no emprego de técnicas rápidas e eficientes de Deep Learning aplicadas á análise de imaxes.
A segunda dos faladoiros correu a man de Tom Boudard, investigador da Grenoble INP – Ensimag. Nela expuxo o seu traballo “User Interface in Virtual Reality”, que presenta a descrición básica da realidade virtual analizando as principais diferenzas de deseño entre as interfaces tradicionais e tridimensionales (UI 3D), e propoñendo estratexias de construción das últimas.
Os almorzos TIC Talk reúnen mensualmente, na sala Cloud do CITIC, a persoal investigador do centro coa finalidade de dar a coñecer os seus traballos e promover a comunicación entre os participantes e o público asistente.
