O vicerreitor de Política Científica, Investigación e Transferencia da Universidade da Coruña, Salvador Naya Fernández, e o director do Centro de Investigación en Tecnoloxías da Información e as Comunicación (CITIC), Manuel F. González Penedo, veñen de recibir na sede do CITIC ao director do Centro Tecnolóxico de Supercomputación de Galicia (CESGA) e á nova directora xeral do Quantum Center de Fujitsu, Almudena Justo Martínez.

O obxectivo da reunión, ademais de coñecer á nova directora do centro, foi explorar novas vías de colaboración conxunta entre a UDC e ambos centros en materia de investigación en tecnoloxías de computación cuántica.

A creación do Quantum Center é froito dun acordo de colaboración entre a multinacional tecnolóxica Fujitsu e o CESGA co obxectivo de colaborar coas universidades galegas para impulsar a investigación en tecnoloxías de computación cuántica e promover o desenvolvemento da industria cuántica a nivel rexional e internacional. Deste xeito, contribuirase á creación de empleo e á atracción de talento, asegurando futuras inversións na rexión.

Proximamente está prevista a organización dunha xornada dirixida a investigadores desta disciplina, que terá lugar no CITIC.