Os investigadores do CITIC da UDC María Amparo Alonso Betanzos e Francisco Javier Bellas participaron o pasado 29 de setembro na xornada Tecnoloxía inclusiva contra a soidade: innovación ao servizo do vínculo comunitario, celebrada na Cidade das TIC da Coruña e organizada por Cruz Vermella en Galicia. 

O encontro reuniu a máis de setenta profesionais de diferentes disciplinas para reflexionar sobre o potencial da innovación fronte á soidade non desexada e sobre as condicións necesarias para que a súa incorporación aos coidados e ao acompañamento se realice dun xeito responsable, inclusivo e centrado nas persoas. 

María Amparo Alonso Betanzos, investigadora do CITIC da UDC, participou na mesa Solucións intelixentes para retos humanos, dedicada a analizar as oportunidades, os desafíos e as responsabilidades que acompañan ao desenvolvemento tecnolóxico cando este se orienta ao benestar e á inclusión social. A súa intervención abordou estas cuestións tanto desde unha perspectiva xeral como dende o eido da investigación, poñendo o foco no papel que pode desempeñar a innovación tecnolóxica ante retos sociais complexos. 

Pola súa banda, Francisco Javier Bellas, tamén investigador do centro, participou na mesa redonda Tecnoloxía ao servizo do vínculo comunitario, centrada en como a intelixencia artificial, os sistemas dixitais e a robótica social poden contribuír a identificar situacións de soidade e activar respostas comunitarias. Bellas destacou o potencial destas tecnoloxías, especialmente da IA, para conectar persoas en función dos seus intereses e inquietudes e facilitar determinados servizos mediante sistemas autónomos. O investigador defendeu un desenvolvemento centrado en necesidades reais, que sexa respectuoso coa autonomía e a dignidade humana, cun acceso seguro, e cunha maior alfabetización en intelixencia artificial. 

A xornada incluíu tamén demostracións de robótica, experiencias de innovación social e un café experiencial no que o público puido coñecer in situ algunhas das solucións tecnolóxicas que se están a aplicar ao acompañamento, aos coidados e á prevención do illamento social. 

A participación de María Amparo Alonso Betanzos e Francisco Javier Bellas evidencia a presenza do CITIC da UDC no desenvolvemento e na análise de tecnoloxías orientadas a dar resposta a retos sociais, desde unha perspectiva que combina innovación, investigación e responsabilidade. En liña con varias das conclusións da xornada, esta achega parte dunha concepción da tecnoloxía como ferramenta ao servizo das persoas, capaz de contribuír a reforzar os vínculos comunitarios, previr situacións de illamento e complementar a atención humana sen substituír o valor das relacións persoais e sociais.