• A doutoranda Anabel Díaz Labrador, investigadora do ITG, desenvolverá durante tres meses a súa investigación no Massachusetts Institute of Technology (MIT) grazas ao apoio da área Internacional do CITIC da UDC.

A Coruña, 16 de xullo de 2026.- O CITIC da Universidade da Coruña impulsa unha nova colaboración internacional co Massachusetts Institute of Technology (MIT) que permitirá á doutoranda industrial Anabel Díaz Labrador realizar unha estadía de investigación entre o 1 de agosto e o 31 de outubro de 2026 nunha das institucións científicas e tecnolóxicas de maior prestixio do mundo.

Esta iniciativa foi promovida pola área Internacional do CITIC da UDC, que facilitou esta colaboración grazas á relación previa existente entre ambas as institucións, favorecendo o intercambio de talento, coñecemento e capacidades de investigación.

Anabel Díaz Labrador desenvolve a súa tese de doutoramento no CITIC baixo a dirección de José Luis Calvo Rolle, coordinador do grupo de Ciencia e Técnica Cibernética (CTC), no marco dun doutoramento industrial que compaxina coa súa actividade como investigadora na División de Robótica do centro tecnolóxico ITG.

Investigación en robótica autónoma

Durante a súa estadía no MIT, a investigadora afondará en novas solucións para a robótica autónoma, unha liña de investigación centrada en dotar os robots dunha maior capacidade para comprender a contorna, interactuar de forma natural coas persoas e desprazarse de maneira máis autónoma e segura.

O seu traballo aborda ámbitos como a coordinación de frotas de robots cuadrúpedes, a visión artificial, a comprensión de instrucións mediante intelixencia artificial e o desenvolvemento de técnicas de xeración de mapas intelixentes que permitan mellorar a interpretación da contorna e a toma de decisións dos sistemas robóticos.

Os coñecementos e metodoloxías adquiridos durante esta estadía contribuirán a reforzar a investigación desenvolvida no CITIC e facilitarán a transferencia de coñecemento ao tecido empresarial a través de ITG.

Internacionalización e colaboración científica

Esta acción enmárcase na estratexia de internacionalización do CITIC, orientada a fortalecer a participación do seu persoal investigador en redes internacionais de excelencia e promover colaboracións con institucións científicas de referencia.

A estadía permitirá consolidar os vínculos entre o CITIC, a Universidade da Coruña, ITG e o MIT, favorecendo o desenvolvemento de proxectos conxuntos e a xeración de coñecemento en ámbitos estratéxicos como a intelixencia artificial e a robótica.

Anabel Díaz Labrador é graduada en Enxeñaría Informática pola Universidade da Laguna e máster en Informática Industrial e Robótica pola Universidade da Laguna e a Universidade da Coruña. Actualmente desenvolve a súa tese de doutoramento no CITIC baixo a dirección de José Luis Calvo Rolle e conta cun contrato predoutoral en ITG, onde participa en proxectos de investigación en robótica autónoma.

Sobre o CITIC

O Centro de Investigación en Tecnoloxías da Información e as Comunicacións (CITIC) é un centro de investigación da Universidade da Coruña creado en 2008 para impulsar o avance e a excelencia na I+D+i aplicada ás tecnoloxías da información e as comunicacións.

A súa actividade científica estrutúrase en catro grandes áreas de investigación: Intelixencia Artificial, Ciencia e Enxeñaría de Datos, Computación de Altas Prestacións e Servizos e Redes Intelixentes, ademais dunha liña transversal dedicada á Ciberseguridade.

O CITIC está acreditado como Centro de Excelencia e forma parte da Rede CIGUS para o período 2024-2027, un recoñecemento que avala a calidade e o impacto da súa investigación. A acreditación, estruturación e mellora do centro está cofinanciada pola Xunta de Galicia e pola Unión Europea, a través do Programa FEDER Galicia 2021-2027, co obxectivo de promover unha Europa máis intelixente mediante unha transformación económica innovadora e intelixente (ED431G 2023/01).