O vindeiro venres, 23 de outubro, ás 12:00 horas, terá lugar a segunda sesión do ciclo de conferencias Converxencia Verde: IA para un futuro sustentable, organizado pola Cátedra UDC-INDITEX de IA en Algoritmos Verdes. A conferencia celebrarase no CITIC da Universidade da Coruña e estará dedicada á eficiencia na visión artificial. 

Baixo o título Percorrido a través da eficiencia en Visión Artificial, a sesión afondará na evolución da IA aplicada á visión por ordenador, desde os algoritmos baseados en CPU ata os métodos altamente paralelos que empregan GPU e NPU. Abordaranse técnicas de optimización, a precisión mixta e os mecanismos de atención eficientes, así como os principais criterios de deseño para desenvolver sistemas de visión artificial eficientes, desde a elección da arquitectura ata o seu despregamento final. 

A conferencia impartiráa Iago Suárez Canosa, enxeñeiro informático pola Universidade da Coruña e doutor en Intelixencia Artificial pola Universidade Politécnica de Madrid. Cofundador de XOIA Software Development, desenvolveu a súa carreira profesional en empresas como Qualcomm. Na actualidade, a súa investigación céntrase na detección de deepfakes e na relación entre a xeración e a detección de imaxes mediante intelixencia artificial. 

Con esta nova sesión, o ciclo continúa explorando o potencial da intelixencia artificial desde a perspectiva da eficiencia computacional e da sustentabilidade, abordando os retos técnicos que permiten avanzar cara a sistemas máis eficientes. 

O acceso á conferencia é libre ata completar a capacidade da sala, pero require inscrición previa a través do seguinte formulario de inscrición. 

Datos da conferencia 

• Data: venres, 23 de outubro. 

• Hora: 12:00 h. 

• Lugar: Sala Cloud CITIC da UDC.