O CITIC da UDC participou este xoves na II edición de GALIA TECH, celebrada no Lux Events Center de Santiago de Compostela, cunha mostra de cinco proxectos demostradores que achegan ao tecido produtivo distintas aplicacións da intelixencia artificial e doutras tecnoloxías avanzadas no ámbito da saúde.

O evento, impulsado por DATAlife, reuniu empresas, centros de coñecemento e outros axentes do ecosistema innovador galego arredor das posibilidades da intelixencia artificial e da súa aplicación práctica en diferentes sectores. Neste contexto, o CITIC contou cun espazo de demostración no que as persoas asistentes puideron coñecer diferentes solucións desenvolvidas no ámbito da investigación e da innovación tecnolóxica.

Os cinco demostradores presentados polo CITIC enmárcanse no sector de Saúde e Coidados e mostran diferentes aproximacións ao uso dos datos, da intelixencia artificial, da visualización avanzada e da computación cuántica no ámbito sanitario.

Cinco demostradores para achegar a tecnoloxía á práctica sanitaria

Entre as solucións mostradas atópase CINEM3D, unha proposta de visualización científica avanzada baseada na simulación física do transporte da luz. O proxecto permite xerar experiencias de visualización médica fotorrealistas e interactivas en 3D, con aplicacións orientadas á formación médica avanzada, á planificación cirúrxica e á realización de estudos personalizados.

O CITIC presentou tamén INSTRUM3D, un proxecto colaborativo centrado na creación e publicación de xemelgos dixitais de instrumental médico mediante modelos 3D cun nivel de detalle profesional. A proposta está orientada a aplicacións educativas e de investigación en centros de formación sanitaria e permite desenvolver simuladores interactivos e experiencias de formación avanzada.

Outro dos demostradores foi o Detector de Pólipos de Colon, unha aplicación prototipo baseada en redes neuronais para a detección automatizada de pólipos en imaxes colonoscópicas. O sistema emprega unha análise mediante xanela deslizante para identificar as zonas con maior probabilidade de presenza de pólipos, co obxectivo de proporcionar apoio ao diagnóstico especializado.

Tamén se mostrou AtaixAID, un sistema intelixente de asistencia ao diagnóstico de enfermidades raras. A ferramenta combina síntomas e datos xenéticos con repositorios especializados de enfermidades raras e integra información clínica e xenética mediante técnicas de procesamento da linguaxe natural, co propósito de facilitar diagnósticos máis rápidos e precisos.

Por último, o CITIC mostrou unha aplicación de redes neuronais recorrentes cuánticas ao diagnóstico de trastornos respiratorios do sono. A proposta aplica intelixencia artificial baseada en transformadores e redes neuronais recorrentes cuánticas á análise de sinais de polisomnografía, utilizando sinais fisiolóxicos como ECG, EOG e saturación de osíxeno (SaO₂) para diferenciar períodos normais de episodios de apnea ou hipopnea.

En conxunto, os cinco demostradores permitiron mostrar distintas capacidades do CITIC no desenvolvemento de tecnoloxías aplicadas a problemas concretos do ámbito sanitario, desde a visualización médica e os xemelgos dixitais ata o diagnóstico asistido mediante intelixencia artificial e a análise de sinais fisiolóxicos.

Amparo Alonso participa no debate sobre IA e saúde

A participación do CITIC en GALIA TECH completouse coa intervención da catedrática Amparo Alonso nunha mesa de debate dedicada a «IA e saúde: oportunidades e riscos».

A sesión permitiu abordar diferentes aspectos relacionados coa incorporación da intelixencia artificial ao ámbito sanitario, un campo no que o desenvolvemento tecnolóxico convive con retos vinculados ao uso dos datos, á fiabilidade dos sistemas e á aplicación responsable destas ferramentas.

A presenza de Amparo Alonso, xunto coa exposición dos cinco demostradores, permitiu ofrecer unha visión complementaria da actividade do CITIC: desde a investigación e o desenvolvemento de tecnoloxías avanzadas ata a súa aplicación a necesidades concretas do sector da saúde.