Os investigadores do CITIC Cristian R. Munteanu e Alejandro Pazos desenvolveron unha aplicación móbil con Intelixencia Artificial para a detección de pólipos de colon en imaxes de colonoscopia, en colaboración cun grupo internacional de programadores XLandC e a Rede Galega de Investigación sobre Cancro Colorrectal (REGICC). O equipo creou Polyp detector, unha aplicación gratuíta descargable desde Google Play.

Un equipo de investigadores do CITIC finalizou o proxecto AOAIRE -Desenvolvemento de tecnoloxía para o secado de produtos forestais-. O equipo estivo liderado polos investigadores do CITIC Marcos Gestal e Julián Dorado, xunto con Alejandro Pazos, Nieves Pedreira e Cristian R. Munteanu. O proxecto, financiado polo programa Conecta Peme, consiste en mellorar o rendemento dos sistemas de secado, probar novas tecnoloxías de secado e reducir o custo relacionado coas operacións de secado nos serradoiros de Galicia. A tarefa do equipo investigador centrouse en facilitar a cubicaxe da madeira nas operacións posteriores ao secado.

A Universidade da Coruña é unha das primeiras universidades españolas en instalar medidores de CO2 nas súas dependencias, garantindo así espazos de traballo seguros. Este proxecto de investigación de Intelixencia Artificial está coordinado polo investigador do CITIC Carlos Escudero, que é ademais adxunto do reitor para Tecnoloxías da Información e as Comunicacións.

O programa supoñerá a captación internacional de 8 investigadores/as que se integrarán nos equipos de investigación do CITIC. O importe da concesión ascende a 650.000 euros. Trátase do primeiro programa concedido a unha institución galega dentro da prestixiosa convocatoria europea.

Torusware, startup creada por un equipo de investigadores do CITIC, forma parte do consorcio galego que investiga unha técnica de análise para incorporar material reciclado á industria 4.0 circular. O proxecto denominado TACTICS (Novas Técnicas de Control para a Transición Industrial cara a unha Economía Circular Segura) foi posto en marcha xunto con outras dúas empresas galegas, AMSLab e Sigillum.

O proxecto GEMA (GEstión de la MovilidAd), liderado polo Centro de Investigación TIC (CITIC) da Universidade da Coruña, logrou desenvolver tres aplicacións funcionais destinadas a mellorar a xestión da mobilidade dos traballadores, así como unha ferramenta capaz de automatizar a creación de novas aplicacións de mobilidade. Así o expuxo a coordinadora xeral do proxecto, a investigadora do CITIC Nieves R. Brisaboa, no acto de presentación de resultados que tivo lugar esta mañá no centro.

Os investigadores do CITIC Valentín Barral, José A. García Naya, Luis Castedo, Carlos J. Escudero e Javier Rodas González desenvolveron unha unidade de control telemática para embarcar nun vehículo eléctrico, no marco do proxecto europeo HiPERFORM (High performant Wide Band Gap Power Electronics for Reliable, energy efficient drivetrains and Optimization through Multi-physics simulation), baseado en novos dispositivos de electrónica de potencia e que ofrece unha alta eficiencia enerxética.

Un equipo de investigadores do CITIC desenvolveu a ferramenta PhotoILike, nacida no seo da empresa de base tecnolóxica Artificial Intelligence Indestia, participada pola UDC. Trátase dun sistema de Intelixencia Artificial destinado ao mercado inmobiliario co obxectivo de seleccionar as imaxes con maior impacto comercial. Os investigadores do CITIC que forman parte deste proxecto son Juan Jesús Romero, Adrián Carballal, Francisco Cedrón e Nereida Rodríguez.

O edificio do CITIC será ampliado co obxectivo de fortalecer a estratexia de posicionamento da UDC a nivel nacional e internacional no terreo da Intelixencia Artificial e reforzar as edificacións sostibles. Con esta reforma, o CITIC será dotado con dous novos laboratorios de investigación nas áreas de Intelixencia Artificial e Big Data. Ademais, tamén se optimizarán e acondicionarán interiormente espazos comúns.