O IV Congreso XoveTIC, organizado polo CITIC, congregou o 7 e 8 de outubro a máis dun centenar de asistentes en formato híbrido. Investigadores e investigadoras júnior presentaron un total de 62 traballos no ámbito das TIC.
O investigador do CITIC Luis Castedo acaba de recibir a Medalla de Investigación 2021, que concede a Real Academia Galega de Ciencias (RAGC) para distinguir a traxectoria consolidada de cinco científicas e científicos galegos en activo das tres universidades galegas. Castedo foi elixido pola sección de Ciencias Técnicas para recibir a medalla Isidro Parga Pondal.
Hoxe lánzase a convocatoria do concurso de ideas de arquitectura para o novo edificio da UDC “CITIC. Cidade das TIC”, dirixido a arquitectos/as titulados/as e estudantes de Arquitectura.
O CITIC recolleu a testemuña no Congreso Español de Informática (CEDI) da organización da próxima edición, que se celebrará en 2024. O CEDI 20/21 tivo lugar en Málaga do 22 ao 24 de setembro, coordinado pola Sociedade Científica Informática de España (SCIE). No acto de clausura do evento, os investigadores Nieves Rodríguez Brisaboa e Miguel Rodríguez Luaces representaron ao comité organizador da edición coruñesa.
Juan Romero, profesor titular da Universidade da Coruña e investigador da área de Intelixencia Artificial do CITIC, foi nomeado a Mellor Docente de España 2021, categoría Universidade, na V Edición dos Premios Educa ABANCA.
Este martes, 21 de setembro, tivo lugar no CITIC unha reunión entre membros do centro e da AXEGA co obxectivo de avanzar na análise de melloras tecnolóxicas en IA que se poidan implementar na xestión de emerxencias.
O Colexio Profesional de Enxeñaría en Informática de Galicia (CPEIG) outorga o Premio Innovación Tecnolóxica no Ensino da “XIII Noite da Enxeñaría en Informática de Galicia” ao Centro de Investigación TIC (CITIC) da Universidade da Coruña polo seu proxecto ‘Talentos Inclusivos’.
O vindeiro venres 24 de setembro terá lugar a G-NIGHT, Noite Galega das Persoas Investigadoras, un evento de divulgación científica que se celebra de forma simultánea en toda Europa, dentro da Noite Europea das Persoas Investigadoras. En Galicia a actividade está coordinada pola Universidade de Vigo, coa implicación das tres universidades galegas e diferentes centros e institutos tecnolóxicos e de investigación.
A investigadora do CITIC Thais Pousada realizou unha estancia de investigación na Universidade de Sevilla, vinculada ao desenvolvemento do sub-proxecto “MATCH: Avaliación e asesoramento para a mellor eficiencia e efectividade da tecnoloxía de apoio”. Durante a estancia no grupo de investigación “Tecnoloxías para a Asistencia, a Integración e a Saúde” (TAIS), a investigadora participou en diferentes reunións para avanzar no desenvolvemento do proxecto.
Torusware, startup creada por un equipo de investigadores do CITIC, encabeza a clasificación das empresas galegas que mellor xestionan o talento. Así o determina o informe ARDÁN de Xestión do Talento en 2021, desenvolvido polo Consorcio da Zona Franca de Vigo.
Este martes 14 de setembro tivo lugar no Paraninfo da Reitoría da Universidade da Coruña o acto de toma de posesión de novos catedráticos e profesorado titular de Universidade. Os investigadores do CITIC Germán Aneiros Pérez, Francisco Javier Bellas Bouza e Óscar Fontenla Romero tomaron posesión como catedráticos, e Enrique Fernández Blanco, Javier Parapar López e Óscar Pedreira Fernández fixérono como profesores titulares.
O proxecto “TFG para o desenvolvemento de aplicacións informáticas de apoio á diversidade” dirixido polo subdirector do CITIC Javier Pereira Loureiro e os docentes da Facultade de Informática e persoal investigador do CITIC, Adriana Dapena Janeiro, Paula Castro Castro e Óscar Fresnedo Arias, resultou galardoado na II Edición dos Premios á Innovación Docente en Proxectos de Aprendizaxe-Servizo da Universidade da Coruña.
