A investigadora do CITIC Verónica Bolón moderará o seminario “Xeración de coñecemento desde unha perspectiva de xénero”, organizado con motivo do Día da Muller e a Nena na Ciencia pola Academia Joven de España (AJE), entidade na que Verónica Bolón é académica de número.
O investigador do CITIC Carlos J. Escudero coordina un proxecto para analizar a distribución do CO2 en aulas e dependencias da UDC, que pretende obter modelos sobre o seu comportamento e determinar cal é o ACH (Air Changes per Hour). Desta forma, búscase garantir a calidade do aire nos interiores da universidade para proporcionar espazos seguros fronte ao COVID-19 e contribuír a longo prazo a unha maior eficiencia enerxética.
Este xoves 4 de febreiro celebrarase o terceiro taller das Xornadas Horizon Europe, organizadas polo CITIC e impartidas de forma online. As anteriores sesións tiveron lugar os días 21 e 28 de xaneiro.
A Xunta convocou 151 novas axudas predoutorais e posdoutorais da modalidade de formación inicial de investigadores en Galicia. Estas axudas contan cun financiamento de 15,2 millóns de euros aportados polos orzamentos autonómicos a través dunha acción conxunta entre a Consellería de Cultura, Educación e Universidade e a Vicepresidencia segunda e Consellería de Economía, Empresa e Innovación.
O vindeiro xoves 28 de xaneiro celebrarase a Asemblea Ordinaria do CITIC 2021, que este ano terá lugar en formato online. A reunión está dirixida a toda a comunidade do CITIC, que conta con máis de 250 profesionais, entre persoal investigador (investigadores/as permanentes, non permanentes e en formación) e persoal de xestión.
As investigadoras do CITIC Betania Groba, Laura Nieto e Thais Pousada, xunto ao subdirector Javier Pereira, impartirán un ano máis o MOOC “Tecnoloxías para a participación activa na diversidade funcional”, que se celebrará a partir do próximo 15 de marzo. Este curso é acollido pola plataforma MiríadaX e a súa inscrición é libre e gratuíta.
A investigadora do Centro de Investigación TIC (CITIC) da Universidade da Coruña, Minia Manteiga, foi nomeada vicepresidenta da Sociedade Española de Astronomía. O nomeamento fíxose efectivo neste mes de xaneiro e ocupará o cargo durante os próximos catro anos. A investigadora é a primeira catedrática de Astrofísica en Galicia, especialista en evolución estelar, astrofísica espacial e Big Data Astronomy, e docente na Escola Superior de Náutica e Máquinas da Universidade da Coruña.
O pasado 15 de decembro probouse no Metro de Bilbao a ferramenta de validación da interface radio do sistema de comunicacións sen fíos cos trens do metro desenvolvida polo CITIC no marco do proxecto INRA-CBTC para a empresa CAF Signalling S.L.
A investigadora do CITIC Amparo Alonso foi galardoada co Premio Gallegos del Año 2020 outorgado por El Correo Gallego, que celebra a súa trixésimo primeira edición. Estes premios buscan recoñecer ás persoas máis destacadas de Galicia.
Unha vez definidos todos os equipos de traballos e os retos a desenvolver por parte dos centros educativos participantes no proxecto Talentos Inclusivos, púidose dar comezo ás sesións de sensibilización sobre a parálise cerebral dirixidas a todos os equipos de traballo participantes. Esta semana tiveron lugar as sesións co colexio Calasanz PP. Escolapios, o IES de Ortigueira e o colexio Salesianos San Juan Bosco.
O director do CITIC, Manuel F. González Penedo, foi nomeado membro do Comité Asesor en Intelixencia Artificial da International AIQT Foundation, a plataforma de competencia internacional nos campos da intelixencia artificial e a tecnoloxía cuántica, con sede en Suíza.
A Sociedade Científica Informática de España (SCIE) e a Fundación BBVA acaban de convocar os Premios de Investigación Sociedade Científica Informática de España – Fundación BBVA 2021.
