O proxecto Ocuexplorer 5G desenvolveu unha ferramenta de tele-oftalmoloxía que pon ao alcance de toda a poboación un servizo avanzado de coidado oftalmolóxico. No proxecto colaboran Telefónica, o Centro Internacional de Oftalmoloxía Avanzada Prof. Fernández Vigo, Nokia, Idronia e o CITIC.
A investigadora do Grupo de Microbioloxía do Instituto de Investigación Biomédica da Coruña (INIBIC), Margarita Poza, foi invitada a participar este luns 22 de marzo no foro organizado pola Comisión Europea “SARS-CoV-2 Monitoring employing Sewers. Designing the EU Sewer Sentinel System for SARS-CoV-2 (EUS4)”. A microbióloga explicará os resultados do proxecto COVIDBENS (Monitorización de variantes do SARS-CoV-2 en augas residuais da Coruña), que lidera e do que tamén forman parte os investigadores do CITIC Susana Ladra e Ricardo Cao.
O programa supoñerá a captación internacional de 8 investigadores/as que se integrarán nos equipos de investigación do CITIC. O importe da concesión ascende a 650.000 euros. Trátase do primeiro programa concedido a unha institución galega dentro da prestixiosa convocatoria europea.
Torusware, startup creada por un equipo de investigadores do CITIC, forma parte do consorcio galego que investiga unha técnica de análise para incorporar material reciclado á industria 4.0 circular. O proxecto denominado TACTICS (Novas Técnicas de Control para a Transición Industrial cara a unha Economía Circular Segura) foi posto en marcha xunto con outras dúas empresas galegas, AMSLab e Sigillum.
O proxecto GEMA (GEstión de la MovilidAd), liderado polo Centro de Investigación TIC (CITIC) da Universidade da Coruña, logrou desenvolver tres aplicacións funcionais destinadas a mellorar a xestión da mobilidade dos traballadores, así como unha ferramenta capaz de automatizar a creación de novas aplicacións de mobilidade. Así o expuxo a coordinadora xeral do proxecto, a investigadora do CITIC Nieves R. Brisaboa, no acto de presentación de resultados que tivo lugar esta mañá no centro.
Os investigadores do CITIC Valentín Barral, José A. García Naya, Luis Castedo, Carlos J. Escudero e Javier Rodas González desenvolveron unha unidade de control telemática para embarcar nun vehículo eléctrico, no marco do proxecto europeo HiPERFORM (High performant Wide Band Gap Power Electronics for Reliable, energy efficient drivetrains and Optimization through Multi-physics simulation), baseado en novos dispositivos de electrónica de potencia e que ofrece unha alta eficiencia enerxética.
Un equipo de investigadores do CITIC desenvolveu a ferramenta PhotoILike, nacida no seo da empresa de base tecnolóxica Artificial Intelligence Indestia, participada pola UDC. Trátase dun sistema de Intelixencia Artificial destinado ao mercado inmobiliario co obxectivo de seleccionar as imaxes con maior impacto comercial. Os investigadores do CITIC que forman parte deste proxecto son Juan Jesús Romero, Adrián Carballal, Francisco Cedrón e Nereida Rodríguez.
O edificio do CITIC será ampliado co obxectivo de fortalecer a estratexia de posicionamento da UDC a nivel nacional e internacional no terreo da Intelixencia Artificial e reforzar as edificacións sostibles. Con esta reforma, o CITIC será dotado con dous novos laboratorios de investigación nas áreas de Intelixencia Artificial e Big Data. Ademais, tamén se optimizarán e acondicionarán interiormente espazos comúns.
O investigador do CITIC Carlos J. Escudero coordina un proxecto para analizar a distribución do CO2 en aulas e dependencias da UDC, que pretende obter modelos sobre o seu comportamento e determinar cal é o ACH (Air Changes per Hour). Desta forma, búscase garantir a calidade do aire nos interiores da universidade para proporcionar espazos seguros fronte ao COVID-19 e contribuír a longo prazo a unha maior eficiencia enerxética.
O pasado 15 de decembro probouse no Metro de Bilbao a ferramenta de validación da interface radio do sistema de comunicacións sen fíos cos trens do metro desenvolvida polo CITIC no marco do proxecto INRA-CBTC para a empresa CAF Signalling S.L.
A Xunta de Galicia, a través da Axencia Galega de Innovación (GAIN), apoia con máis de medio millón de euros a posta en marcha de tres proxectos dirixidos por investigadores do Centro de Investigación TIC (CITIC) da Universidade da Coruña para avanzar na loita contra o COVID-19. Os investigadores principais destes proxectos son Ricardo Cao, Marcos Ortega Hortas e José Santos Reyes.
O investigador do CITIC Javier Parapar acaba de regresar da súa estancia como Visiting Faculty Researcher en Google AI en Londres. Durante oito meses, traballou no equipo de Sistemas de Recomendación.
