A artista de Character FX (CFX) e profesora da UDC, Fátima Davite Aguiar, impartirá o vindeiro martes 25 de maio unha charla dentro do programa “Das TIC ao ceo”, impulsado polo CITIC e o Consello Social da UDC para fomentar vocacións científico-tecnolóxicas entre estudantes de secundaria e bacharelato. Fátima Davite ofrecerá unha conferencia online ao alumnado do IES Ortigueira, que estará moderada polo subdirector do CITIC, Javier Pereira.

O próximo 29 de maio de 2021, ás 9:30 horas, terá lugar de maneira virtual o I Encontro Maker pola Discapacidade Física e Orgánica. O evento está organizado pola Confederación de Persoas con Discapacidade Física e Orgánica de Castela e León, e conta coa colaboración da Universidade de Burgos e do CITIC da Universidade da Coruña.

Este martes, 18 de maio, tivo lugar a inauguración do Demostrador Tecnolóxico do CITIC, un espazo de divulgación da actividade de I+D+i que se realiza no centro. O acto contou coa presenza do conselleiro de Cultura, Educación e Universidade, Román Rodríguez; o secretario xeral de Universidades, José Alberto Díez de Castro; a alcaldesa da Coruña, Inés Rey; o reitor da Universidade da Coruña, Julio Abalde; o presidente do Consello Social da UDC, Antonio Abril; o vicerreitor de Política Científica, Investigación e Transferencia da UDC, Salvador Naya; e o director do CITIC, Manuel F. González Penedo.

O investigador do CITIC José A. Iglesias Guitián impartirá este xoves 6 de maio unha charla en formato online dentro do programa “Das TIC ao ceo”, impulsado polo CITIC e o Consello Social da UDC para fomentar vocacións científico-tecnolóxicas entre estudantes de secundaria e bacharelato. O investigador ofrecerá unha conferencia destinada a 40 alumnos e alumnas de bacharelato do IES Terra de Trasancos de Narón, que estará moderada polo subdirector do CITIC, Javier Pereira.

O proxecto HiPERFORM, no que participan os investigadores do CITIC Valentín Barral, José A. García Naya, Luis Castedo, Carlos J. Escudero e Javier Rodas González, finalizará o próximo mes de outubro. Para a presentación pública de resultados, o equipo de traballo organizou un ciclo de webinars para achegar os aspectos máis destacados do proxecto, iniciado en maio de 2018.

A investigadora do CITIC Thais Pousada ofreceu diferentes charlas en centros educativos para expoñer as necesidades ás que se ven sometidas as persoas con diversidade funcional na súa vida diaria, presentando os produtos tecnolóxicos que axudan a mellorar a súa calidade de vida e centrándose no potencial que teñen as impresoras 3D nesta área.

A investigadora do CITIC Verónica Bolón participou na multiconferencia web organizada por ICT-Go-Girls, iniciativa promovida polo Centro de Supercomputación de Galicia (CESGA). Con motivo do Día Internacional das Nenas nas TIC, varias investigadoras explicaron neste encontro con escolares o que a tecnoloxía pode aportar en diferentes campos para mellorar a vida de todos.

O investigador do CITIC Alejandro Pazos participará o próximo 28 de abril no debate “Big Data e Intelixencia Artificial: Son os meus datos o novo petróleo?”, organizado polo Centro de Visión por Computador (CVC) e a Fundación “la Caixa”. O obxectivo é dar a coñecer as amplas oportunidades e os retos que supón incorporar a Intelixencia Artificial á análise de datos de alta calidade.

O CITIC e o Consello Social da UDC poñen en marcha o ciclo “Das TIC ao ceo”, un programa de conferencias que ten o obxectivo de fomentar vocacións científico-tecnolóxicas entre estudantes de secundaria e bacharelato. Así, diferentes profesionais de recoñecido prestixio dentro do sector achegarán a súa experiencia no desenvolvemento da súa carreira profesional aos mozos. Desta forma, visibilízanse casos de éxito para servir como referente e fomentar o interese de cara ás disciplinas STEAM.

Un equipo de investigadores e investigadoras do CITIC participou na defensa de proxectos no programa STEMbach do curso 2020/2021. O subdirector Javier Pereira e a investigadora Thais Pousada titorizaron diferentes proxectos de estudantes de bacharelato dos institutos Miraflores e María Casares de Oleiros e o instituto Sofía Casanova de Ferrol. As estudantes xa presentaron con éxito os seus proxectos, enfocados no ámbito da tecnoloxía para persoas con diversidade funcional.

O delegado territorial da Xunta de Galicia na Coruña, Gonzalo Trenor López, e o xefe territorial da Consellería de Cultura, Educación e Universidade para a provincia da Coruña, Indalecio Cabana Leira, visitaron a sede de ASPACE Coruña para interesarse polo avance do proxecto.
O proxecto Talentos Inclusivos está desenvolvido polo CITIC da UDC, ASPACE Coruña e o Consello Social da UDC.