O investigador do CITIC Carlos Vázquez Cendón participou como conferenciante convidado no Workshop on Impacts of Climate Change on Economics, Finance and Insurance, celebrado do 19 ao 23 de setembro de 2022 no prestixioso Fields Institute de Toronto, un centro de investigación no que participan varias universidades canadenses.
O CITIC participará un ano máis na G-NIGHT, a Noite Europea das Persoas Investigadoras, que se celebra este venres 30 de setembro. No CITIC realizarase unha visita divulgativa polas instalacións do centro, con énfase no Demostrador Tecnolóxico e no Laboratorio de Realidade Virtual e Localización, onde os/as asistentes poderán probar diferentes desenvolvementos de realidade virtual, realidade aumentada, robótica, etc.
Tras o parón vacacional, este martes 27 de setembro retomáronse os Almorzos TIC Talk, un ciclo de reunións informais dirixidas ao persoal investigador do CITIC que se atopa nas primeiras etapas da súa carreira, para compartir a investigación que se realiza no centro e potenciar a transversalidade e a colaboración. Nesta quinta sesión, o responsable de Sistemas do centro, Alejandro Mosteiro, fixo un percorrido polas instalacións do centro, centrándose nos novos laboratorios de Robótica, de Realidade Virtual e Localización, e de Impresión 3D, así como o Centro de Procesado de Datos e o Demostrador Tecnolóxico.
Coñecer os avances no desenvolvemento do software intelixente de apoio á toma de decisións e a aplicación dos últimos modelos de intelixencia artificial no diagnóstico por imaxe desenvoltos polo CITIC. Estes foron os obxectivos da visita que realizou este martes o equipo directivo do Colexio de Médicos da Coruña ás instalacións do CITIC, na que participaron tanto o director, Manuel F. González Penedo, como o subdirector do centro, Javier Pereira.
O Máster en Matemática Industrial, coordinado polo investigador do CITIC Íñigo Arregui Álvarez e organizado polas tres universidades galegas, xunto coas universidades Carlos III e Politécnica de Madrid, e o Máster en Computación de Altas Prestacións, coordinado por Jorge González Domínguez e impartido entre as universidades da Coruña e Santiago de Compostela, recibiron recentemente a mención de Máster Universitario Excelente por parte da Xunta de Galicia. Nesta resolución, o goberno galego tamén recoñeceu ao Máster en Produción Xornalística e Audiovisual, organizado pola UDC.
Entre o 28 e o 30 de setembro celebrarase no CITIC a reunión plenaria da Unidade de Coordinación 8 (CU8) do consorcio europeo DPAC para o procesado de datos da misión espacial Gaia da Axencia Espacial Europea. Este grupo de traballo é o encargado de levar a cabo a clasificación e a determinación dos parámetros astrofísicos observados por Gaia, como as temperaturas estelares ou os redshifts das galaxias.
O CITIC da UDC consegue novos logros no ámbito da Intelixencia Artificial aplicada ao desenvolvemento sostible, considerado estratéxico para a transferencia do centro de investigación. O grupo que dirixe José Luis Calvo Rolle vén de recibir cadanseu premio da man do Comité Español de Automática (CEA) por dous traballos sobre control intelixente en enerxía eólica e almacenamento de enerxía con hidróxeno, respectivamente.
O CITIC recibiu hoxe a visita dunha dunha delegación da AGH University of Science and Technology de Cracovia composta por tres profesores, acompañábaos o profesor da Facultade de Economía e Empresa da UDC Félix Puime, co que actualmente colaboran.
O Centro de Investigación en TIC, CITIC, acolleu esta mañá a presentación online do equipo IT do grupo MASMOVIL, unha acción organizada no marco da Cátedra R en Ciberseguridade UDC-UVigo. O director do CITIC, Manuel Penedo, presentou a iniciativa e deu paso a Ravin Dhalani e Mikel Fernández, membros do equipo de IT do grupo MASMOVIL. Ambos presentaron ao alumnado o departamento de desenvolvemento de software da compañía e afondaron nas posibilidades que existen de formar parte do seu equipo.
A proposta dunha nova arquitectura xerárquica (H-GRAIL) para robótica cognitiva, que selecciona os obxectivos para alcanzar en base a motivacións intrínsecas é eixo central do traballo de investigación realizado polos investigadores Richard J. Duro e Alejandro Romero. O traballo foi presentado por ambos na Conferencia Internacional do IEEE sobre Desenvolvemento e Aprendizaxe (ICDL) 2022, que se celebrou a pasada semana en Londres.
